تقطیع، شاعری اور بلاگ

saleem jamal

@saleem786

23 اکتوبر 2024
موزوں

saleem jamal
@saleem786

رشتے تو سبھی نِبھا رہا ہوں

لیکن کچھ بس چَلا رہا ہوں

ہے چھوڑ دیا شکوہ کرنا

زیرِ لب مُسکرا رہا ہوں

باطِن کے وحشی جانور کو

الفت کا سبق پڑھا رہا ہوں

رشتے تو سبھی نِبھا رہا ہوں

17 اکتوبر 2024
غزل

saleem jamal
@saleem786

آنکھ میں جب نمی نہیں رہتی

عشق میں بے خودی نہیں رہتی

ٹوٹ جائے اگر بھروسہ تو پھر

رشتوں میں چاشنی نہیں رہتی

بُغض میں مُبتلا ہوا جو اگر

روح میں تازگی نہیں رہتی

آنکھ میں جب نمی نہیں رہتی

14 اکتوبر 2024
موزوں

saleem jamal
@saleem786

وہ دعا ' اے مرے یار ! کامل نہیں

اشک اخلاص کے جس میں شامل نہیں

ایسی دولت سے نانِ جویں خوب ہے

جب سکونِ دل و جان حاصل نہیں

کیسے دے گا وہ درسِ محبت بھلا

جو حقیقت میں خود اِس کا حامل نہیں

وہ دعا اے مرے یار کامل نہیں

8 اکتوبر 2024
موزوں

saleem jamal
@saleem786

مِری تسبیح کے بکھرے ہیں یوں دانے سارے

رفتہ رفتہ ہوئے گُم چہرے پُرانے سارے

یاد کے شہر میں اب بھی دلِ نادان مرا

کُو بہ کُو ڈھونڈتا ہے گُزرے زمانے سارے

ناز تھا جن کو کفِ چارہ گری پر یارو

ہیں کہاں دردِ دروں میں وہ سیانے سارے

مری تسبیح کے بکھرے ہیں یوں دانے سارے

12 اگست 2024
غزل

saleem jamal
@saleem786

صاحبِ مقدُور اِتنا ہم پہ چِلاتا کیا ہے؟

سہمے سہمے زندہ لاشے ڈراتا کیا ہے؟

ہیں دشمن کھڑے شمشیریں لئے سر پہ ہمارے

اپنا ہو کے تیر اپنوں پہ تُو برساتا کیا ہے؟

جب مفتی و قاضی ہی ہوں شاہوں کے ہم نوا

پھر کُنجِ زنداں میں شور مچاتا کیا ہے؟

صاحبِ مقدُور اِتنا ہم پہ چِلاتا کیا ہے

31 جولائی 2024
قطعہ

saleem jamal
@saleem786

رگوں میں جو لہو اُبل رہا ہے

کچھ نہ کچھ آج دل کو پھر ہوا ہے

مطلبی ہے یہ دُنیا جب ساری

کسی سے کیا جمال پھر گِلہ ہے

رگوں میں جو لہو اُبل رہا ہے

22 جون 2024
غزل

saleem jamal
@saleem786

اندھے گونگے بہرے قاضی ہو گئے

رہنما باطل کے حامی ہو گئے

سر اُٹھایا جس نے بھی اپنا یہاں

شہرِ ظُلمت کے وہ باغی ہو گئے

توڑ کے رشوت کے لُقمے عمر بھر

آخرش حاجی نمازی ہو گئے

اندھے گونگے بہرے قاضی ہو گئے

28 مئی 2024
غزل

saleem jamal
@saleem786

لوگوں کی باتوں سے دل بُرا نہیں کرتے

اندیشوں کے سانپوں کی پروا نہیں کرتے

جن کی آنکھوں میں چمکتا ہو خورشیدِ منزل

مڑ کے قدموں کے نشاں وہ دیکھا نہیں کرتے

اندیشوں کے سانپوں کی پروا نہیں کرتے

16 مئی 2024
موزوں

saleem jamal
@saleem786

میں کہہ گیا تھا تجھے اپنی رائیگانی میں

پِھسل ہی جاتی ہے اکثر زباں روانی میں

نگاہِ یار کے بس ایک زاویے کے سبب

اُجڑ گیا ہے مرا باغِ دل جوانی میں

لکھے گا جب کوئی افسانۂ جنوں یارو

مرا بھی نام کہیں آئے گا کہانی میں

میں کہہ گیا تھا تجھے اپنی رائیگانی میں

26 اپریل 2024
موزوں

saleem jamal
@saleem786

کس نے کہا ہے رنگ زمیں کی چمک کے دیکھ

اِک بار تُو بھی رازِ نہاں خود فلک کے دیکھ

کُھل ہی نہ جائے سب پہ کہیں تیرے دل کا راز

زخموں کو قہقہوں کی رداوُں سے ڈھک کے دیکھ

تُجھ کو بھی اپنے ساتھ کی دُنیا دکھائی دے

سر سے تُو کوہِ کبر کو اپنے جھٹک کے دیکھ

کس نے کہا ہے رنگ زمیں کی چمک کے دیکھ

24 اپریل 2024
موزوں

saleem jamal
@saleem786

کیا کیا ہے کھویا اور کیا ہے مِلا مجھے

اے قلبِ شکستہ یاد مت کچھ دِلا مجھے

سفر زندگی کا رائیگاں ہی گیا مرا

نہ ملا تُو اور نہ ہی ملا ہے خُدا مجھے

کیا کیا ہے کھویا اور کیا ہے ملا مجھے

22 اپریل 2024
موزوں

saleem jamal
@saleem786

ناداں نکلے ورنہ ملے تو تھے اشارے بہت

کہ محبت میں ہوتے ہیں بھاری خسارے بہت

یہ ترا ہی جنوں تھا جو غرق ہوا بحرِ الفت

ورنہ کشتیِ جاں کی نِگہ میں تھے کنارے بہت

اِک ہم ہی نہیں گرداشِ دوراں میں خاک بسر

اِس دنیا میں رنج و غم کے ہیں مارے بہت

ناداں نکلے ورنہ ملے تو تھے اشارے بہت

22 اپریل 2024
موزوں

saleem jamal
@saleem786

حُسن و شباب پہ تیرے زمانہ مرتا ہے

درشن کو شب بھر مہتاب ترستا ہے

ہے سر سبز وجود سے تیرے فصلِ شباب

سانسوں کی خوشبو سے گلشنِ دہر مہکتا ہے

گیسوؤں میں سے ٹپکتی بُوندوں کی رنجش میں

بادل لیل و نہار گرج کے برستا ہے

حُسن و جمال پہ تیرے زمانہ مرتا ہے

20 اپریل 2024
غزل

saleem jamal
@saleem786

تیری دُنیا کے رنگ دیکھے ہیں

قلب لوگوں کے تنگ دیکھے ہیں

سارے مخلص نہیں ہیں رستے میں

کچھ منافق بھی سنگ دیکھے ہیں

دشمنوں سے گلہ نہیں کوئی

میں نے یاروں کے ڈنگ دیکھے ہیں

تیری دُنیا کے رنگ دیکھے ہیں

19 اپریل 2024
غزل

saleem jamal
@saleem786

نُور مدھم سہی ضیا تو ہے

چاند تاروں نے کچھ دیا تو ہے

بُجھ گیا جو چراغِ سحر تو کیا

ظُلمتِ شب میں یہ جلا تو ہے

چاہے ریشم کی ایک تار بُنی

مرنے سے پہلے کچھ کیا تو ہے

نُور مدھم سہی ضیا تو ہے

18 اپریل 2024
موزوں

saleem jamal
@saleem786

مُجھ سے مت پُوچھو غمِ عاشقی کی رُوداد

میں رانجھا ہوں اور نہ ہی کوئی فرہاد

اتنا بھی مان نہ کر اِس حُسنِ گُلابی پر

کِبر تو تقویٰ بھی کر دیتا ہے برباد

مُجھ سے مت پُوچھو غمِ عاشقی کی رُوداد

17 اپریل 2024
موزوں

saleem jamal
@saleem786

وہ کیسے حسیں زیست کے حالات کرے گا

برباد جو خود اپنی اگر ذات کرے گا

جب دل کا لہو دل میں ہی برفاب ہوا ہو

پھر کس سے محبت کی کوئی بات کرے گا

مایوس ہوا ہو جو میاں عقل و خِرد سے

کچھ اور سَوا دل کے وہ صدمات کرے گا

وہ کیسے حسیں زیست کے حالات کرے گا

18 اپریل 2024
موزوں

saleem jamal
@saleem786

مدت ہوئی جب تجھ سے کوئی بات نہیں ہے

اِس واسطے جذبات میں برسات نہیں ہے

وہ جس میں چمکتے تھے مرے مرمریں سپنے

آنگن میں مرے چاند کی وہ رات نہیں ہے

اُس رب کا کرم ہے کہ بہت کچھ ہے مرے پاس

اِک تیری کمی ہے تُو مرے ساتھ نہیں ہے

مدت ہوئی جب تجھ سے کوئی بات نہیں ہے

17 اپریل 2024
نظم

saleem jamal
@saleem786

تاریکیوں میں جیسے ستارے نکلتے ہیں

غم سے ہمارے عِلم کے دھارے نکلتے ہیں

نفرت کسی کی جل تو رہی ہے وجود میں

ہر لفظ میں جو اپنے شرارے نکلتے ہیں

اب تو یہ بات ہم کو بتائے گا وقت ہی

اِن دشمنوں میں کتنے ہمارے نکلتے ہیں

تاریکیوں میں جیسے ستارے نکلتے ہیں

17 اپریل 2024
غزل

saleem jamal
@saleem786

کسی غرض سے وہ میرے دیار میں آیا

میں نے یہ سمجھا کہ وہ میرے پیار میں آیا

میں نے تھی کھائی قسم تُجھ کو بُھول جانے کی

لبوں پہ نام ترا تو بُخار میں آیا

وفورِ درد سے دل میرا ہو گیا پتھر

کسی غمِ دروں کے یہ حصار میں آیا

کسی غرض سے وہ میرے دیار میں آیا

17 اپریل 2024
موزوں

saleem jamal
@saleem786

جو درد چُھپا رکھا تھا دل کے چھالوں میں

عیاں بھی ہوا تو ہوا آنکھوں کے پیالوں میں

کچھ ایسی ہوئی سِیہ راتوں سے فُرقت میں الفت

کہ مری تو آنکھ ہی دکھتی ہے اب اُجالوں میں

فرصت ہی نہ ملی کہ جی لیتا کچھ اپنے لئے

پھنس کے رہ گیا ہوں غمِ ہستی کے جالوں میں

جو درد چُھپا رکھا تھا دل کے چھالوں میں

15 اپریل 2024
موزوں

saleem jamal
@saleem786

موسمِ فصلِ بہاراں جو پلٹ آئے گا

وقت پھر جیسا بھی مشکل ہو وہ کٹ جائے گا

نغمہ بلبل کا سدا گونجے گا گلشن گلشن

شاخ در شاخ یہ بھنورا یونہی منڈلائے گا

دن بدن بڑھتی چلی جائے گی یہ آنکھ کی دُھند

کب تلک دل کا دِیا روشنی دے پائے گا

موسمِ فصلِ بہاراں جو پلٹ آئے گا

13 اپریل 2024
غزل

saleem jamal
@saleem786

میکدے میں شراب باقی ہے

ابھی میرا شباب باقی ہے

رکھ دیا ہے جلا کے دل میرا

اور کتنا حساب باقی ہے

آج کا دن بھی تھا اُداس بہت

ابھی شب کا عذاب باقی ہے

میکدے میں شراب باقی ہے

12 اپریل 2024
موزوں

saleem jamal
@saleem786

کوئی تو ابر اِدھر آئے گا زر کی مانند

میں ہوں صحرا میں کھڑا سُوکھے شجر کی مانند

یادِ رفتہ سے کوئی عشق دھواں دیتا ہے

دل مرا جلتا ہے اِک آہِ شرر کی مانند

کوئی تو آ کے تراشے گا کبھی ہاتھوں سے اپنے

میں ہوں اِک سنگِ سرِ راہگزر کی مانند

کوئی تو ابر اِدھر آئے گا زر کی مانند

12 اپریل 2024
موزوں

saleem jamal
@saleem786

یہ زندگی فُرقتِ حبس میں بے جاں ٹھہر گئی ہے

اے دلِ حزیں روٹھی بادِ بہار کدھر گئی ہے

تا عمر بھٹکتے رہے ہم دشتِ تمنا میں

جو اِک خواہش نے جنم لیا تو اِک مر گئی ہے

میں رویا اور نہ ہی کُھل کر ہنسا جب اے دل

پھر وقتِ جدائی آنکھ مری کیوں بھر گئی ہے

یہ زندگی فرقتِ حبس میں بے جاں ٹھہر گئی ہے

12 اپریل 2024
موزوں

saleem jamal
@saleem786

پیالۂ زہر بھرا دے رہے ہیں

اُنس و وفا کی جَزا دے رہے ہیں

دردِ جگر دے کے ہم کو وہ کافر

بیٹھ کے پاس دوا دے رہے ہیں

جلتے ہیں جِن انگاروں پر ہم

غم خوار اُن کو ہوا دے رہے ہیں

پیالۂ زہر بھرا دے رہے ہیں

12 اپریل 2024
موزوں

saleem jamal
@saleem786

نَے کوئی دیدہ ور اور نہ ہی رہبر اپنا

کامراں کیسے ہو عشقِ جنوں کا یہ سفر اپنا

قطرہ قطرہ نہ بھر دل میرا درد سے اے زیست

تُو یک بار اُتار دے لہو میں یہ زہر اپنا

اتنا بھی نہ ڈرا اے واعظ موت سے ہم کو

آ ہی نہ جائے کہیں سُن سُن کے یہ ذِکر اپنا

نَے کوئی دیدہ ور اور نہ ہی رہبر اپنا

12 اپریل 2024
غزل

saleem jamal
@saleem786

شبِ غم کا یہ چاند آج کہاں سے آ نکلا

مرا دل شاید کسی زخمی یاد میں جا نکلا

چھپا رکھا تھا یہ دردِ ستم سینے میں مگر

میرا آنسو بھی تیری طرح بے وفا نکلا

میں سمجھتا تھا کہ میں ہی غم کا مارا ہوں مگر

جس کو بھی دیکھا وہ درد کا اِک دریا نکلا

شبِ غم کا یہ چاند آج کہاں سے آ نکلا

12 اپریل 2024
موزوں

saleem jamal
@saleem786

وہ جفا کر کے بھی باکردار نکلے

ہم وفا کر کے بھی گُنہ گار نکلے

سُولی چڑھا تو دیکھا یہ صحنِ مقتل

میرے مُنصف میرے ہی کچھ یار نکلے

حالِ دل میرا جب بھی پوچھا کسی نے

میری آنکھوں سے آنسو ہر بار نکلے

وہ جفا کر کے بھی باکردار نکلے

12 اپریل 2024
غزل

saleem jamal
@saleem786

شامِ الم ڈھل بھی جائے تو اثر رہتا ہے

ڈنک نکال بھی دو تو زہر مگر رہتا ہے

جا کے کوئی تو بتلائے یہ ابرِ کرم کو

دل میں مرے اِک سُوکھا اُداس شجر رہتا ہے

گو کہ گُزر چکا ہے غمِ دوراں کا موسم

پھر بھی اجنبی سا دل میں اِک ڈر رہتا ہے

شامِ الم ڈھل بھی جائے تو اثر رہتا ہے

12 اپریل 2024
موزوں

saleem jamal
@saleem786

غزل ۔۔

سہم جاتا ہے اب یہ دل میرا

کسی آسیب کا ہے یاں ڈیرا

نِبھا لیتا میں عشق یہ شاید

پڑا تھا روزگار کا گِھیرا

اپنوں سے کوئی گلہ شکوہ نہیں

سہم جاتا ہے اب یہ دل میرا

12 اپریل 2024
موزوں

saleem jamal
@saleem786

حشر کے دن پڑے لالے ہوں گے

سب کی زباں پر تالے ہوں گے

ظُلم جنہوں نے پالے ہوں گے

اُن کے دل بھی کالے ہوں گے

مت کر میرے مرنے پہ ماتم

تم نے بھی جام اُچھالے ہوں گے

حشر کے دن پڑے لالے ہوں گے

8 اپریل 2024
غزل

saleem jamal
@saleem786

زندگی کر کے بیزار چلا گیا

مجھ کو وہ کر کے بیمار چلا گیا

پہلے تو کیا خَس و خار یہ دل مرا

رکھ کے پھر اِس پہ انگار چلا گیا

ناخُدا چھوڑ کے بیچ طوفاں مجھے

خونی دریا کے خود پار چلا گیا

زندگی کر کے بیزار چلا گیا

8 اپریل 2024
غزل

saleem jamal
@saleem786

دل کا کیا ہے اِک روز بہل ہی جائے گا

کوئی تو خوشبو کا جُھونکا اِسے ٹکرائے گا

شبِ ہجر تو ڈھل ہی جائے گی ہولے ہولے

پر بِن ترے عید کا چاند بہت تڑپائے گا

اِتنا دیکھا ہے میری آنکھوں نے تجھ کو کہ اب

رہ رہ کے چہرہ تیرا خوابوں میں ستائے گا

دل کا کیا ہے اِک روز بہل ہی جائے گا

5 اپریل 2024
غزل

saleem jamal
@saleem786

زندگی بے وفا ہوتی ہے

پھر بھی یہ دلرُبا ہوتی ہے

چاہتا کون ہے مرنا یاں

موت تو بد دعا ہوتی ہے

آتشِ عشق میں زندگی

دھیرے دھیرے فنا ہوتی ہے

زندگی بے وفا ہوتی ہے

4 اپریل 2024
غزل

saleem jamal
@saleem786

مے خانوں میں بے خودی بولتی ہے

یہ تُو نہیں مے کشی بولتی ہے

نہیں جب ہوتا کوئی پاس مرے

تو بے زباں خامشی بولتی ہے

تم کچھ بھی نہ بولو تو پھر بھی ترے

چہرے کی اُداسی بولتی ہے

مے خانوں میں مے کشی بولتی ہے

2 اپریل 2024
غزل

saleem jamal
@saleem786

بُغض ہے دل میں تو چہروں پہ سجاوٹ کیوں ہے

پیار کے رشتوں میں یہ اتنی بناوٹ کیوں ہے

میں نے تو حق کی بس اِک بات کہی تھی لیکن

تیرے چہرے پہ ندامت کی تھکاوٹ کیوں ہے

تُو نے ہر گام پہ جب مجھ کو دیے ہیں دھوکے

تیری آنکھوں میں چھلکتی یہ لگاوٹ کیوں ہے

بُغض ہے دل میں تو چہروں پہ سجاوٹ کیوں ہے

2 اپریل 2024
غزل

saleem jamal
@saleem786

سیکھا ہے درویشوں کی مدہوشی سے

سہ لیتا ہوں سب باتیں خاموشی سے

کیسا لاپرواہ ہے دلبر میرا بھی

سُن نہ سکا جو آہ بھی ہم آغوشی سے

کچھ بھی نہیں باقی اب بزمِ رِنداں میں

مرتے نہیں ہیں غم بھی اب مے نوشی سے

سیکھا ہے درویشوں کی مدہوشی سے

2 اپریل 2024
رباعی

saleem jamal
@saleem786

عقل و دانِش کا دم نِکل جاتا ہے

آنکھوں کو کچھ نظر نہیں آتا ہے

پھیکی پڑ جاتیں ہیں سب تدبیریں

جب رنگ مقدر اپنا دِکھلاتا ہے

عقل و دانش کا دم نکل جاتا ہے

2 اپریل 2024
رباعی

saleem jamal
@saleem786

مال و جاہ و حسن و ضیا کچھ بھی نہیں

یہ دنیا دھوکے کے سِوا کچھ بھی نہیں

مُفلس کی چھاتی پہ چلے عدل کا تیر

زَردار کے واسطے سزا کچھ بھی نہیں

مال و جاہ و حُسن و ضیا کچھ بھی نہیں

2 اپریل 2024
غزل

saleem jamal
@saleem786

دامِ بھنور میں کوئی سہارا نظر نہیں آتا

کشتیِ غم کو بھی میری کِنارہ نظر نہیں آتا

گُم ہو گیا جو گُوشۂ شہرِ خَموشاں میں اِک بار

لاکھ پکارو بھی تو وہ دوبارہ نظر نہیں آتا

ظُمتِ شب کو مرا جو زوال سمجھ بیٹھے ہیں

چڑھتا ہے سُورج تو اِک تارا نظر نہیں آتا

دامِ بھنور میں کوئی سہارا نظر نہیں آتا

2 اپریل 2024
غزل

saleem jamal
@saleem786

تاراج جب سے یہ مرا شہرِ جُنُوں ہوا

ناحق گلی گلی میں گلابوں کا خوں ہوا

ہم کس سے پوچھیں شہر کے اُجڑنے کا سبب ؟

جب پاسباں کے ہاتھ سے حالِ زبوں ہوا

پھیلی ہوئی ہے چاروں طرف جو یہ خامشی

اُس کی نظر سے کون سا ایسا فسُوں ہوا ؟

تاراج جب سے یہ مرا شہرِ جنوں ہوا

2 اپریل 2024
موزوں

saleem jamal
@saleem786

خود شناسی میں کبھی ایسا مقام آتا ہے

آدمی جس میں تماشائی سا بن جاتا ہے

اشک کرنے چلے آتے ہیں چراغاں اُس میں

عشق اپنے لئے گھر دل میں جو بنواتا ہے

جب بھی کھل جاتے ہیں اسرارِ فقیری دل پر

آدمی غم میں بھی پھر لطف و سکوں پاتا ہے

خود شناسی میں کبھی ایسامقام آتا ہے

31 مارچ 2024
موزوں

saleem jamal
@saleem786

شہرت کی بلندی پہ سنائی نہیں دیتا

اِس خبط میں آنکھوں کو سُجھائی نہیں دیتا

مسند پہ جو فرعون بنے بیٹھے ہوئے ہیں

مُوسٰی کا عصا اُن کو دکھائی نہیں دیتا

ایسا نہ ہو ہم اپنی زباں کاٹ لیں یارو

صیاد قفس سے جو رہائی نہیں دیتا

شہرت کی بلندی پہ سنائی نہیں دیتا

31 مارچ 2024
موزوں

saleem jamal
@saleem786

اُداسی یہ بے شُمار کیسی

بھڑکتی ہے دل میں نار کیسی

ہواؤں میں بس گئی ہے خُوشبو

ترے بِنا یہ بہار کیسی

نہیں جو ہے کوئی دل میں میرے

ہے آتی پھر یہ پُکار کیسی

اُداسی یہ بے شمار کیسی

30 مارچ 2024
موزوں

saleem jamal
@saleem786

جب سے یہ دنیا بنی ہے

یاں محبت کی کمی ہے

نفرتیں ہیں مسندوں پر

فرش پر الفت دھری ہے

بند ہیں سب دل کے رستے

برف جذبوں پر جمی ہے

جب سے یہ دُنیا بنی ہے

30 مارچ 2024
موزوں

saleem jamal
@saleem786

رات اندھیری اور تنہائی

یادوں کی میں نے شمع جلائی

سیکھی کہاں سے یہ شعلہ نوائی

میرے دل میں جو آگ لگائی

پھولوں سے یارانہ تھا میرا

خوشبو سے ہی چوٹ ہے کھائی

رات اندھیری اور تنہائی

30 مارچ 2024
موزوں

saleem jamal
@saleem786

جو غم تُو دے کے بیٹھا ہے

وہ آنسو بن کے بہتا ہے

یہ جو پتھر ہے رستے میں

یہ بلکل میرے جیسا ہے

یہ سپنا بس نہیں سپنا

مرا یہ کُل اثاثہ ہے

جو غم تُو دے کے بیٹھا ہے

30 مارچ 2024
موزوں

saleem jamal
@saleem786

دِیے مدھم نہیں ہوتے

مرے غم کم نہیں ہوتے

مہک اُٹھتا تھا جب یہ دل

وہ اب موسم نہیں ہوتے

بگڑ کیا جاتا دُنیا کا

یہاں جو ہم نہیں ہوتے

دیے مدہم نہیں ہوتے

28 مارچ 2024
موزوں

saleem jamal
@saleem786

اکثر کھو سا جاتا ہوں میں

رنج و الم آہِ سوزاں میں

مُلکِ عدم کے رازِ نہاں میں

خوابوں کے شہرِ ویراں میں

دُنیا کے شُورِ طِفلاں میں

ہوش و خِرد اور سُود و زیاں میں

اکثر کھو سا جاتا ہوں میں

27 مارچ 2024
غزل

saleem jamal
@saleem786

غم سے عِلم کے دھارے نکلے

تاریکی میں تارے نکلے

جلتا ہے کچھ قلب و جاں میں

لب جو کُھلے، انگارے نکلے

وقت برا ہے، یہ مت پوچھو

کتنے سجن ہیں ہمارے نکلے

غم سے علم کے دھارے نکلے

26 مارچ 2024
غزل

saleem jamal
@saleem786

تم نے ابھی کھیلی بھی نہیں آنکھ مچولی ہے

اور میں نے جوانی صحرا گردی میں رولی ہے

گر شوقِ تماشہ کبھی اُٹھا جو مرے دل میں

تو آنسوؤں سے کھیلی اپنے میں نے ہولی ہے

جب بھی کبھی نِکلا بہلانے کو میں جی گھر سے

میری غمِ ڈولی میرے ساتھ ہی ہو لی ہے

تم نے ابھی کھیلی بھی نہیں آنکھ مچولی ہے

20 مارچ 2024
موزوں

saleem jamal
@saleem786

وہ عقل و خِرد بدگُماں لگتی ہے

جس کو نارِ عشق دُھواں لگتی ہے

گردن میں ہو جس کے طوقِ اِبلیسِیت

اُس کو بانگِ اَذاں گَراں لگتی ہے

وہ عقل و خِرد بدگُماں لگتی ہے

19 مارچ 2024
موزوں

saleem jamal
@saleem786

کبھی بھولی ہوئی یادوں کی جب بارات آتی ہے

تو میری آنکھ میں اشکوں کی اک برسات آتی ہے

برستی جب بھی ہیں بوندوں کی ٹپ ٹپ دل کے صحن میں

مرے اندر ترے غم کی اُداسی ساتھ آتی ہے

یونہی جلتے نہیں ہیں یہ چراغِ زخم برسوں سے

ہمارے دل کو تڑپانے کو لمبی رات آتی ہے