| کوئی امید بر نہیں آتی |
| کوئی صورت نظر نہیں آتی |
| موت کا ایک دن معین ہے |
| نیند کیوں رات بھر نہیں آتی |
| آگے آتی تھی حال دل پہ ہنسی |
| اب کسی بات پر نہیں آتی |
| جانتا ہوں ثوابِ طاعت و زہد |
| پر طبیعت ادھر نہیں آتی |
| ہے کچھ ایسی ہی بات جو چپ ہوں |
| ورنہ کیا بات کر نہیں آتی |
| کیوں نہ چیخوں کہ یاد کرتے ہیں |
| میری آواز گر نہیں آتی |
| داغِ دل گر نظر نہیں آتا |
| بو بھی اے چارہ گر نہیں آتی |
| ہم وہاں ہیں جہاں سے ہم کو بھی |
| کچھ ہماری خبر نہیں آتی |
| مرتے ہیں آرزو میں مرنے کی |
| موت آتی ہے پر نہیں آتی |
| کعبے کس منہ سے جاؤ گے غالب |
| شرم تم کو مگر نہیں آتی |
بحر
|
خفیف مسدس مخبون محذوف مقطوع
فاعِلاتن مفاعِلن فِعْلن |
||
|
خفیف مسدس مخبون محذوف مقطوع
فَعِلاتن مفاعِلن فِعْلن |
||
|
خفیف مسدس مخبون محذوف
فاعِلاتن مفاعِلن فَعِلن |
||
|
خفیف مسدس مخبون محذوف
فَعِلاتن مفاعِلن فَعِلن |
اشعار کی تقطیع
تقطیع دکھائیں
معلومات