ڈوبتے کی پکار

29 جولائی 2020
نظم

جوش ملیح آبادی

کل فکر یہ تھی کشورِ اسرار کہاں ہے

اب ڈھونڈ رہا ہوں کہ درِ یار کہاں ہے

پھر حُسن کے بازار میں بکنے کو چلا ہوں

اے جنسِ تدبر کے خریدار کہاں ہے

پھر روگ لگایا ہے مرے دل کو کسی نے

اے چارہ گرِ خاطرِ بیمار کہاں ہے

پھر بر سرِ تخریب ہے اک جلوۂ کافر

اے کعبۂ حکمت کے نگہ دار کہاں ہے

ہنگامہ ہے پھر دل میں بپا سود و زیاں کا

اے تجربۂ اندک و بسیار کہاں ہے

پھر عشق کے خورشید کی سر پر ہے کڑی دھوپ

اے عقل، ترا سایۂ دیوار کہاں ہے

پھر مائلِ دریوزہ ہے خود داریِ شاعر

اے جزر و مدِ غیرتِ فنکار کہاں ہے

پھر چرخِ تفکر پہ ہیں زلفوں کی گھٹائیں

اے فاتحِ اقلیمِ شبِ تار کہاں ہے

پھر خواب کے گرداب میں غلطاں ہے دلِ زار

اے کشتیِ اندیشۂ بیدار کہاں ہے

راتوں کے اندھیروں میں ہے پھر اشک فشانی

اے روشنیِ طبعِ گہربار کہاں ہے

ادراک سے پھر عشق بغاوت پہ ہے طیار

اے فکر کی چلتی ہوئی تلوار کہاں ہے

پایل کے کھنکنے میں ہے پھر دعوتِ زنجیر

اے بربطِ اطلاق کی جھنکار کہاں ہے

پھر خون میں غلطیدہ ہے زیرِ لب و رخسار

اے قاطعِ زہرِ لب و رخسار کہاں ہے

آوارہ ہے پھر دشت و بیاباں میں دلِ جوش

اے تمکنتِ گوشۂ افکار کہاں ہے