نہ گلِ نغمہ ہوں نہ پردۂ ساز - مرزا غالب - عروض

29 جولائی 2020
غزل

مرزا غالب

نہ گلِ نغمہ ہوں نہ پردۂ ساز

میں ہوں اپنی شکست کی آواز

تو اور آرائشِ خمِ کاکل

میں اور اندیشہ ہائے دور دراز

لاف تمکیں، فریبِ سادہ دلی

ہم ہیں، اور راز ہائے سینہ گداز

ہوں گرفتارِ الفتِ صیّاد

ورنہ باقی ہے طاقتِ پرواز

وہ بھی دن ہو، کہ اس ستم گر سے

ناز کھینچوں، بجائے حسرتِ ناز

نہیں دل میں مرے وہ قطرۂ خون

جس سے مژگاں ہوئی نہ ہو گلباز

اے ترا غمزہ یک قلم انگیز

اے ترا ظلم سر بسر انداز

تو ہوا جلوہ گر، مبارک ہو!

ریزشِ سجدۂ جبینِ نیاز

مجھ کو پوچھا تو کچھ غضب نہ ہوا

میں غریب اور تو غریب نواز

اسدُؔ اللہ خاں تمام ہوا

اے دریغا وہ رندِ شاہد باز

نہ گلِ نغمہ ہوں نہ پردۂ ساز

بحر

921

اشعار کی تقطیع

تقطیع دکھائیں