| مجرم ہے گناہ گار بھی ہے |
| بے شرم ہے بے وقار بھی ہے |
| فرعون سے لے کے کبر کوئی |
| دنیا میں ذلیل و خوار بھی ہے |
| ظالم کو سزا پھر اور، اسی کا |
| چوری چھپے انتظار بھی ہے |
| ہم دِکھتے تو متحد ہیں سارے |
| دل میں مگر انتشار بھی ہے |
| حیرت سے نہ دیکھ دستِ مرشد |
| پیروں تلے اقتدار بھی ہے |
| دکھ درد و الم کے ساتھ ہرپل |
| اس دل میں خیالِ یار بھی ہے |
| احسان و مدد کے قرض کا بوجھ |
| سر پر مِرے مستعار بھی ہے |
| کچھ آج پلا دے مجھ کو ساقی |
| تو بھی تو یہیں مے خوار بھی ہے |
| چلمن نے کہا رخ و جبیں سے |
| پردے سے بے پردہ عار بھی ہے |
| ہر رات لگے یوں چپکے چپکے |
| پلکوں پہ کوئی سوار بھی ہے |
| کچھ موج کرے وطن کے دھن پر |
| دھن لوٹ کے کچھ فرار بھی ہے |
| آزاد ہوئے زمانہ گزرا |
| پر قید وہی حصار بھی ہے |
| کردار و عمل سے بھاگے بھاگے |
| لیکن زباں سے نثار بھی ہے |
| ہر پھول سے چہرے پر نہ جانا |
| ہر پھول کے نیچے خار بھی ہے |
| یہ جیت ہمیشہ یاد رکھنا |
| اس جیت میں ایک ہار بھی ہے |
| ہنسنا ہے ابھی تو ہنس لے جی بھر |
| رونا یہیں زار زار بھی ہے |
معلومات