| "مکمل صبر کی تصویر ہونا" |
| کبھی ممکن نہیں شبیر ہونا |
| جو نذرانہ انہیں اشکوں کا بھیجے |
| اسے دشوار ہے دلگیر ہونا |
| مبارک باد خاکِ کربلا کو |
| ترا یوں خاک سے اکسیر ہونا |
| جو پہنچا تھا میں دشتِ کربلا کو |
| تھی میرے خواب کی تعبیر ہونا |
| تمہی کو زیب، اے نورِ نبی ہے |
| سراپا نور کی تنویر ہونا |
| تمہیں الله نے تفضیل بخشی |
| نہیں ممکن تِری تصغیر ہونا |
| مقدر تھا نبی زادوں کے حق میں |
| ازل سے صاحبِ تطہیر ہونا |
| پڑھے جاؤ اگر نادِ علی تم |
| ہے نا ممکن تِرا درگیر ہونا |
| محاذِ عشق یعنی کربلا کی |
| نہیں ممکن کہیں تفسیر ہونا |
| حسینِ پاک کے قدموں کے باعث |
| اُس ارضِ ناز کی تشہیر ہونا |
| گلِ تازه کی اک خنده لبی سے |
| لعیں کا قبلِ تعزیر ہونا |
| ترے انصار کا رب کی رضا پر |
| غضب تھا یوں تہِ شمشیر ہونا |
| تمہارے اہل خانہ پر ستم تھا |
| یوں سب کا حلقۂ زنجیر ہونا |
| ہے سر پر سایۂ الطافِ وارث |
| ہے نا ممکن مِرا تسخیر ہونا |
| *اثر* ماتھے لگی ہے خاکِ کربل |
| مبارک صاحبِ تاثیر ہونا |
معلومات