کلمہ پاک

اے کلمہ ورد نرالا اے، اے وِچّ ہنیر اُجالا اے

سُتے بخت جگاون والا اے، پڑھو لا الہ الا اللہ

اے کلمہ ساڈا اِیمان میاں، سوہنے رب نا اے احسان میاں

جند جان اِتھوں قربان میاں، پڑھو لا الہ الا اللہ

اے کلمہ دِلَے کی پاک کریہہ، فِر نُورِ اِلٰہی نال بھریہہ

دِل ہر دم اللہ ھُو اِی کریہہ، پڑھو لا الہ الا اللہ

جس پیار کِتا اِس کلمے نال، دُکھ سارے دیسی اُس نے ٹال

دو جگ وچ کَرسی مالا مال، پڑھو لا الہ الا اللہ

جد وقت نزع ناں طاری ہوویہہ، اے کلمہ زبان تے جاری ہوویہہ

اُتُوں دید نبی نی پیاری ہوویہہ، پڑھو لا الہ الا اللہ

اے کلمہ ٹکٹ اے جنّت ناں، اے بخشن ہار اے اُمّت ناں

اے مظہر رب نی رحمت ناں، پڑھو لا الہ الا اللہ

تُوں وِرد اے زیرکؔ کرنا ریہہ، تُوں کلمے ناں دم بھرنا ریہہ

تُوں عشق نا زینہ چڑھنا ریہہ، پڑھو لا الہ الا اللہ