| غزل |
| زندگی ہو گُل و گلُ زار، ضروری تو نہیں |
| شاعری میں لَب و رُخسار، ضروری تو نہیں |
| خُوب ہو خواب میں تسکینِ تمنا ہر شب |
| رُو برُو رَوز ہو دیدار، ضروری تو نہیں |
| آپ برتیں نہیں اظہارِ محبت میں جھجھک |
| جشن کے واسطے، تہوار ضروری تو نہیں |
| بات اچھی ہو، سلیقے سے ہو، لازم ، لیکن |
| شاعرانہ ہی ہو گفتار، ضروری تو نہیں |
| سب مراسم میں مد و جزر یقیناً آئیں |
| دل ہمہ وقت ہوں، سرشار ضروری تو نہیں |
| خوبیوں ہی سے مرصع ہے جو ہر پہلو سے |
| ہر فسانے میں وہ کردار، ضروری تو نہیں |
| آشنا بھی تو کیا کرتے ہیں سازش چھپ کر |
| غیر ہی ہوں پسِ دیوار، ضروری تو نہیں |
| عجز مطلوب ہے سجدے میں اِلہ کو مطلق |
| خلق شب بھر رہے بیدار، ضروری تو نہیں |
| مسکراتے ہو، شہاب، آتی ہے منہ پر رونق |
| ورنہ، بیٹھے رہو بیزار، ضروری تو نہیں |
| شہاب احمد |
| ۹ اپریل ۲۰۲۵ |
معلومات