| کسی کی فہم و فراست میں کیا سمائے حسین (رضی اللہ عنہ) |
| بس انتہائے عقیدت ہے ابتدائے حسین (رضی اللہ عنہ) |
| یزیدِ وقت کے ہاتھوں پہ بیعتیں کر کے |
| تمام شہر بنا پھرتا ہے گدائے حسین (رضی اللہ عنہ) |
| زمانہ بھر ہے یزیدی مزاج کا حامل |
| فقط زبان لگاتی رہی صدائے حسین (رضی اللہ عنہ) |
| غمِ حسین (رضی اللہ عنہ) غمِ زندگی سے افضل ہے |
| خدایا مجھ کو بھی رکھنا تو مبتلائے حسین (رضی اللہ عنہ) |
| زمانے بھر میں کوئی دوسرا حسین (رضی اللہ عنہ) نہیں |
| نہ کربلا ہے کوئی اور کربلائے حسین (رضی اللہ عنہ) |
| حسین (رضی اللہ عنہ) جس میں تھے راضی میں اس پہ راضی ہوں |
| مری زباں نہ پکارے گی ہائے ہائے حسین (رضی اللہ عنہ) |
| شہید ہو کے بھی مولا نے سر اٹھا کے کہا |
| خدا کی جو بھی رضا ہے وہی رضائے حسین (رضی اللہ عنہ) |
| ہمارے دل پہ نظر ہے حسین (رضی اللہ عنہ) کی جامی |
| کہا حسین (رضی اللہ عنہ) جو میں نے تو مسکرائے حسین (رضی اللہ عنہ) |
معلومات