یہ اک سوال سوالات سے زیادہ ہے |
تری خموشی جوابات سے زیادہ ہے |
ہمارا حل یہ ہے بے موت مارے جائیں بس |
ہمارا مسئلہ صدقات سے زیادہ ہے |
کسی کا ملنا بھی دنیا میں ہے نہ ملنے سا |
کسی کی یاد ملاقات سے زیادہ ہے |
کوئی لحاظ نہیں رکھ رہا دعاؤں میں |
سبھی کا مانگنا اوقات سے زیادہ ہے |
بہت ضروری ہے مصروفیات کا ہونا |
فقط سکون بھی آفات سے زیادہ ہے |
وہ ایک گھر ہو جہاں والدین کا سایا |
وہ ایک گھر بھی مکانات سے زیادہ ہے |
تمہارے مشورے سر آنکھوں پر ہیں دیتے رہو |
تمہارے پاس مری ذات سے زیادہ ہے |
ہر ایک کام ادھورا ہی چھوٹتا ہے کلیم |
ہمارا خرچہ خیالات سے زیادہ ہے |
معلومات