| علی مرتضیٰ لالہ زارِ محمدﷺ |
| نگارِ خدا گل عذارِ محمدﷺ |
| سراپا نبی کا سراپا علی ہیں |
| یوں ٹھہرے علی یادگارِ محمدﷺ |
| دیارِ نبی کے طلب گار سن لو |
| درِ مرتضیٰ ہے دیارِ محمدﷺ |
| علی کے بنا تو نبی نَے ملیں گے |
| ہے روشن بیاں یہ قرارِ محمدﷺ |
| دو عالم میں جو کچھ برائے شفا ہے |
| وہ گردِ علی و غبارِ محمدﷺ |
| جو گردِ رهِ مرتضیٰ گر بنو میں |
| تو بن جاؤں گا میں غبارِ محمدﷺ |
| خدا لائے دن اپنی آنکھوں سے دیکھوں |
| درِ مرتضیٰ اور دیارِ محمدﷺ |
| جہانِ ولا کے وہ ماہِ مبیں ہیں |
| علی نیّر و فیض بارِ محمدﷺ |
| کوئی استعارہ نبی کا جو تھہرے |
| تو مولا علی مستعارِ محمدﷺ |
| جو ہے واقفِ سرّ و رازِ نبی سے |
| وہ حیدر ہی ہیں راز دارِ محمدﷺ |
| امامِ علی سے امامِ زماں تک |
| گلِ لالہ و گل بہارِ محمدﷺ |
| فیوضِ نبی جن سے جاری ہوئے ہیں |
| وہ ابنِ علی آبشارِ محمدﷺ |
| وہ گوہر جو درِّ نبی و علی ہے |
| وه ہیں فاطمہ افتخارِ محمدﷺ |
| علی کی محبت ہے میری محبت |
| عیاں ہے یہ قول و قرارِ محمدﷺ |
| اثر اپنے مرشد کے صدقے میں دیکھے |
| رُخِ لالہ و دل بہارِ محمدﷺ |
معلومات