غزل |
دھوپ سے سایہءِ دیوار تک آتے آتے |
"مر گئے ہم ترے معیار تک آتے آتے " |
بیت جاتی ہیں کئی وصل کی گھڑیاں اس میں |
آپ سے، تم سے، سنو یار تک آتے آتے |
ہے ترے غم کی حرارت کا اثر اشکوں پر |
سوکھ جاتے ہیں یہ رخسار تک آتے آتے |
ہم پہ جو گزری خُدا تم کو بچا لے اس سے |
تری نفرت سے ، ترے پیار تک آتے آتے |
بے وفائی کے گلے، ہجر کے آزار کا دکھ |
بھول جاتے ہیں درِ یار تک آتے آتے |
ہم نے سیکھا ہے تری ذات سے انکار کا گُر |
ہم نفی کرتے ہیں اقرار تک آتے آتے |
کلام : فیصل احمد |
معلومات