| عجب تماشاۓ دل ہے یارب |
| نہ تابِ جلوہ نہ جنبشِ لب |
| پڑی نظر جب سے ماہ رو پر |
| نظامِ قلب و جگر ہے بے ڈھب |
| ہر ایک انداز سے عیاں ہے |
| اداۓ ماہِ تمام یارب |
| ہر ایک غم جاں فزا ہو جائے |
| میں دیکھوں اس خوش ادا کو جب جب |
| نہ پوچھیے یہ جنابِِ والا |
| کہ کیسے گزری ہے آج کی شب |
| کیا ہے شب انتظار جس کا |
| وہ پوچھتا ہے بلائے تھے کب ؟ |
| ادھر ادھر کی کیوں بک رہا ہے |
| تو سب سمجھتا ہے میرا مطلب |
| تمہیں سے روشن ہے محفلِ دل |
| اے میری دنیا کے ماہ و کوکب |
| تمہیں بھلے ہی نہ یاد ہو کچھ |
| مگر مجھے تو ہیں یاد وہ سب |
| گزر گیا اب وہ دور ساقی |
| مزاجِِ شاہیؔ بخیر ہے اب |
معلومات