| حدت، خنکی، شدت، خوشبو ،چاند ستارہ عورت ہے |
| جوش، جوانی، رقص، ترنم ، روپ سہانا عورت ہے |
| نکہت، بادل، موسم، فطرت ، جھیل، گلاب، نشیلی دھوپ |
| تتلی، پھول، سنہری چڑیا، ہرن سوانا عورت ہے |
| بیتِ مومن، نظمِ ساحر ، نغمہِ اختر ، سوزِ میر |
| غزل، قصیدہ، مطلع، مقطع، شعر دو گانا عورت ہے |
| بحرِ آتش، معنیِ غالب، حسنِ ولی اور رنگِ ذوق |
| حرف، حکایت، لفظ، کرشمہ، نثر ٹھکانا عورت ہے |
| شاہدِ عصمت، پردہ نشینی ، مونسِ ہجراں، عجزِ ولی |
| عفت، حرمت، نور، شرافت ، شرم بچانا عورت ہے |
| حورِ گلستاں ، حورِ تبسم، حورِ زمانہ، حورِ جہاں |
| حورِ مجسم، حورِ خیالاں، حور بتانا عورت ہے |
| رنگِ غازہ ، رنگِ حنائی ، شغلِ سرمہ، بوئے حنا |
| کنگھی، کنگن، چوڑی، گجرا سجنا سجانا عورت ہے |
| ادا خطائی، وفا عطائی، ناز قیامت، شوخیِ جاں |
| عشوہ ،نخرہ، چنچل شکوہ ، مکر بہانا عورت ہے |
| رازِ الفت، سازِ راحت ، سوزِ چاہت، نالہِ دل |
| عشق، محبت، پیار، فسانہ نظر لڑانا عورت ہے |
| بدن سریلا، چال قیامت ، فتنہ دوراں ، فتنہِ جاں |
| چشمِ غزالہ، قامتِ موزوں، دکھنا دکھانا عورت ہے |
| باغِ بہاراں، بادِ بہاراں، صبح بہاراں، چشمِ بہار |
| بادل، بارش، ابر مہینہ، راگ پرانا عورت ہے |
| دستِ رنگیں ، سینہِ بسمل، خندہ جبیں اور حیرتِ حسن |
| شوخیِ قاتل، چشم پریشاں، ڈرنا ڈرانا عورت ہے |
| معنی خیزی، حیرت شکنی، سحر بیانی، رازِ غم |
| بلنا ، کڑھنا، رعب، جلاپا ، جلنا جلانا عورت ہے |
| ناصحِ عالم،واعظِ دوراں ، فتح یقینی ، رازِ دوست |
| ہمت، طاقت، جرات، غیرت ، عزم توانا عورت ہے |
| رازِ ہستی ، رازِ فطرت، رازِ مسرت، رازِ حیات |
| قہقہ، چیخ ، خوشی کا نعرہ، ہنسنا ہنسانا عورت ہے |
| نازک جسمی، نرم مزاجی، لچک حیائی، فتنہِ انگ |
| نرمی، نزاکت، لوچ، ملاحت، رنگ جمانا عورت ہے |
| لذت خیزی ، شدت خیزی، شیریں بیانی، میٹھا پن |
| لطف، عنایت، شہد، حلاوت اپنا بنانا عورت ہے |
| دخترِ عالی، روپ سہاگن، رازِ جنت ، باپ کی پگ |
| اماں ، بہن ، بیوی، بیٹی سب نکھرا گھرانا عورت ہے |
| آفتاب شاہ (کتاب ۔۔ کوئی نہیں ۔۔سے انتخاب) |
معلومات