| غزل |
| لٹا چکا ہے تُو اپنا وقار جانے دے |
| تُو بِک چکا ہے مرے جاں نثار جانے دے |
| سپاہ کو نہیں زیبا کہ وہ کریں سازش |
| سجا نہ خون سے یہ سبزہ زار جانے دے |
| ہزار نسلوں سے تیرے غلام ہیں گرچہ |
| ہمارے بچوں کو کر وا گزار جانے دے |
| جکڑ لیا ہے معیشت کو جس نے قرضوں سے |
| تمھیں عزیز وہی ساہو کار جانے دے |
| بندھا ہوا ہے مفادات کی اسیری میں |
| سکھا تُو خود کو وفا کے شعار جانے دے |
| وطن بنائیں گے ہم سامراج کا مدفن |
| بکھر چکا ہے تِرا اقتدار جانے دے |
| کہیں فساد تِرے گھر تلک نہ آ پہنچے |
| سمیٹ لے تُو یہیں انتشار جانے دے |
| مجھے خبر ہے تمھارے رفیق ہیں دشمن |
| نہ بات بات پہ اُن کو پکار جانے دے |
| تری اَنا پہ اگرچہ یہ چوٹ گہری ہے |
| بصد سلوک بصد انکسار جانے دے |
| خزاں رسیدہ شجر کو نویدِ تازہ ہو |
| بہار آنے کو ہے خوشگوار جانے دے |
| جِگر شہاب جلاتا ہے کس لئے آخر |
| بڑھا رہا ہے تُو خوں کا فشار جانے دے |
| شہاب غصہ بجا ہے تُو حق پہ ہے بیشک |
| دِکھا اگرچہ ذرا انکسار جانے دے |
| شہاب احمد |
| ۲۲ جولائی ۲۰۲۲ |
معلومات