| آہ ! اے میری کتاب ! آہ ! اے میری کتاب |
| اے تری امید میں ، میں کھا رہا ہوں پیچ و تاب |
| رات و دن تیرے تصور میں سراپا اضطراب |
| آہ ! اے میری کتاب |
| اے مری تقدیر کا روشن ستارہ جگمگا |
| ہیں بہت امید تجھ سے اک جہاں کا انقلاب |
| آہ ! اے میری کتاب |
| عصرِ نو کی رات میں کافی تنک تابی تری |
| اے شبِ ظلمت کے قاتل ! سرخ رو روشن شہاب |
| آہ ! اے میری کتاب |
| دل کے آئینے میں تیری اک حسیں تصویر ہے |
| جس کی شوخی پر ہے شیدا اہلِ دل کا انتخاب |
| آہ ! اے میری کتاب |
| شوخئ تعبیر مجھ کو کچھ نظر آتی نہیں |
| آنکھ کو سونے نہیں دیتا مرا دیرینہ خواب |
| آہ ! اے میری کتاب |
| ہے عدم سے آشنا موجود سے بے گانہ کیوں |
| اے مری دنیا کے روشن آفتاب و ماہتاب |
| آہ ! اے میری کتاب |
| پردۂ تخلیقِ میں ترا بھی ہو کوئی ظہور |
| اے زمینِ ایشیا کے آسماں کا آفتاب |
| آہ ! اے میری کتاب |
| ہر نفس بیدار رکھتی ہے مجھے یہ جستجو |
| لحظہ لحظہ یہ مرے اعصاب کو ہے اب عذاب |
| آہ ! اے میری کتاب |
| ایک مدت سے ہوں بیٹھا آنکھ فرشِ رہ کیے |
| اے مرے محبوب ! اب تو ہوجا مجھ پر بے نقاب |
| آہ ! اے میری کتاب |
| وصل کی امید میں بیتاب جاں رہتا ہوں میں |
| ہجر کے آزار سے ہے تلخ اب میرا شباب |
| آہ ! اے میری کتاب |
| اب نہیں منظور مجھ کو جستجوۓ صبح و شام |
| ایک عرصے سے ہوا جاتا ہوں میں خانہ خراب |
| آہ ! اے میری کتاب |
| گلشنِ ہستی مرا ویراں ہوا جاتا ہے اب |
| ہر طرف خاروں کا ڈیرا ہے ، کہاں کوئی گلاب |
| آہ ! اے میری کتاب |
| بربطِ دل نغمۂ امید سے مایوس ہے |
| سرد پڑتے جارہے ہیں زندگانی کے رباب |
| آہ ! اے میری کتاب |
| بجھ رہا ہے دل مرا مے خانۂ عالم کو دیکھ |
| پھر پلادے ساقیا ! رندوں کو اپنی مئے ناب |
| آہ ! اے میری کتاب |
| اے سراپا ناز و نازش ! اے مرے فخر و غرور |
| اے مرے حسنِ تخیل ! شاہکارِ لا جواب |
| آہ ! اے میری کتاب |
| ہے دعا گو تیرے حق میں شاہؔیٔ بیتاب آج |
| آۓ جب بھی تو جہاں میں ہو مقدر مستجاب |
| آہ ! اے میری کتاب |
معلومات