| شبنم بہ گلِ لالہ نہ خالی ز ادا ہے |
| داغِ دلِ بے درد، نظر گاہِ حیا ہے |
| دل خوں شدۂ کش مکشِ حسرتِ دیدار |
| آئینہ بہ دستِ بتِ بد مستِ حنا ہے |
| شعلے سے نہ ہوتی، ہوسِ شعلہ نے جو کی |
| جی کس قدر افسردگیٔ دل پہ جلا ہے |
| تمثال میں تیری ہے وہ شوخی کہ بصد ذوق |
| آئینہ بہ اندازِ گل آغوش کشا ہے |
| قمری کفِ خاکستر و بلبل قفسِ رنگ |
| اے نالہ! نشانِ جگرِ سوختہ کیا ہے؟ |
| خو نے تری افسردہ کیا وحشتِ دل کو |
| معشوقی و بے حوصلگی طرفہ بلا ہے |
| مجبوری و دعوائے گرفتاریٔ الفت |
| دستِ تہِ سنگ آمدہ پیمانِ وفا ہے |
| معلوم ہوا حالِ شہیدانِ گزشتہ |
| تیغِ ستم آئینۂ تصویر نما ہے |
| اے پرتو خورشیدِ جہاں تاب ادھر بھی |
| سائے کی طرح ہم پہ عجب وقت پڑا ہے |
| ناکردہ گناہوں کی بھی حسرت کی ملے داد |
| یا رب اگر ان کردہ گناہوں کی سزا ہے |
| بے گانگیٔ خلق سے بیدل نہ ہو غالبؔ |
| کوئی نہیں تیرا، تو مری جان، خدا ہے |
بحر
|
ہزج مثمن اخرب مکفوف محذوف
مفعول مفاعیل مفاعیل فَعُولن |
اشعار کی تقطیع
تقطیع دکھائیں
معلومات