| یوں بعدِ ضبطِ اشک پھروں گرد یار کے |
| پانی پیے کسو پہ کوئی جیسے وار کے |
| سیاب پشت گرمیِ آئینہ دے ہے، ہم |
| حیراں کیے ہوئے ہیں دلِ بے قرار کے |
| بعد از وداعِ یار بہ خوں در طپیدہ ہیں |
| نقشِ قدم ہیں ہم کفِ پائے نگار کے |
| ظاہر ہے ہم سے کلفتِ بختِ سیاہ روز |
| گویا کہ تختۂ مشق ہے خطِّ غبار کے |
| حسرت سے دیکھ رہتے ہیں ہم آب و رنگِ گل |
| مانندِ شبنم اشک ہے مژگانِ خار کے |
| آغوشِ گل کشودہ برائے وداع ہے |
| اے عندلیب چل کہ چلے دن بہار کے |
| ہم مشقِ فکرِ وصل و غمِ ہجر سے اسدؔ |
| لائق نہیں رہے ہیں غمِ روزگار کے |
بحر
|
مضارع مثمن اخرب مکفوف محذوف
مفعول فاعلات مفاعیل فاعِلن |
اشعار کی تقطیع
تقطیع دکھائیں
معلومات