عشق تو ایک کرشمہ ہے فسوں ہے یوں ہے - احمد فراز - عروض

29 جولائی 2020
غزل

احمد فراز

عشق تو ایک کرشمہ ہے فسوں ہے یوں ہے

یوں تو کہنے کو سبھی کہتے ہیں یوں ہے یوں ہے

جیسے کوئی درِ دل پر ہو ستادہ کب سے

ایک سایہ نہ دروں ہے نہ بروں ہے یوں ہے

تم محبت میں کہاں سود و زیاں لے آئے

عشق کا نام خِرد ہے نہ جَنوں ہے یوں ہے

اب تم آئے ہو مری جان تماشا کرنے

اب تو دریا میں تلاطم نہ سکوں ہے یوں ہے

تو نے دیکھی ہی نہیں دشتِ وفا کی تصویر

نوکِ ہر خار پے اک قطرۂ خوں ہے یوں ہے

ناصحا تجھ کو خبر کیا کہ محبت کیا ہے

روز آ جاتا ہے سمجھاتا ہے یوں ہے یوں ہے

شاعری تازہ زمانوں کی ہے معمار فراز

یہ بھی اک سلسلۂ کن فیکوں ہے یوں ہے

عشق تو ایک کرشمہ ہے فسوں ہے یوں ہے

بحر

12

1

2116

اشعار کی تقطیع

تقطیع دکھائیں

29 اگست 2020
#1

Shah Meer Khan
@SmkBhagalpuria0003

استاد شاعر کیا بات ہے جناب کی

1