| مہ و انجم سے تاریکی جہاں کی دُور ہوتی ہے |
| دلوں کو چاندنی روشن کرے تو نور ہوتی ہے |
| ہے ظرف اپنا کہاں تک ، دیکھ لینا یہ ضروری ہو |
| اگر ہو وصل کی خواہش ، تو منزل طُور ہوتی ہے |
| انہیں اس سے غرض کیا چاند نکلا یا نہیں نکلا |
| مقدّر میں سدا جن کے شبِ دیجُور ہوتی ہے |
| تدبّر سے ہمیشہ کام لینا چاہئے ہم کو |
| خوشی گرچہ وہی ملتی ہے جو مقدور ہوتی ہے |
| حسیں محبوب سے بڑھ کر نظر کوئی کہاں آئے |
| محبّت کے نشے میں جو نگہ مخمُور ہوتی ہے |
| عیاں کرتا خدا خود ہے ، محبّت چھپ نہیں سکتی |
| وہ دنیا کی نگاہوں سے اگر مستور ہوتی ہے |
| ترقّی چومتی ہے جب قدم اللہ والوں کے |
| کلیجے میں وہ دشمن کے بنی ناسور ہوتی ہے |
| صبا خوشبو لئے آتی ہے اس کے جب دریچے سے |
| نظر آتا ہے سب کو کس قدر مسرور ہوتی ہے |
| تمہیں بھی تجربہ ہو گا ملے ہو اس سے جب طارق |
| کہ اس کے سامنے ہر شے لگے ، مسحور ہوتی ہے |
معلومات