| دیں پہ حاوی ، جہاں ایوان ہوا جاتا ہے |
| باعثِ نوحۂ سلطان ہوا جاتا ہے |
| یہ غنیمت ہے جو دو چار ہیں سانسیں باقی |
| جبکہ جیون مرا مہمان ہوا جاتا ہے |
| یاد ہے دیکھ کے اس کو جو ہوئی پہلی غزل |
| اب مکمّل مرا دیوان ہوا جاتا ہے |
| میری دھڑکن ہی نہیں بستا ہے وہ سانسوں میں |
| دل ہی کیا اب وہ مری جان ہوا جاتا ہے |
| باعثِ فخر ہے قربانی کہ اُس کی رہ میں |
| جان دینا ہی مری شان ہوا جاتا ہے |
| رہنما خود کو جو کہلائیں، انہیں دیکھے تو |
| آج شرمندہ مسلمان ہوا جاتا ہے |
| یہ مضامین ہر اک پر نہیں نازل ہوتے |
| شعر میرا ، مری پہچان ہوا جاتا ہے |
| طارقؔ آسائشِ دنیا سے مجھے کیا مطلب |
| جادۂ تنگ ، مرا مان ہوا جاتا ہے |
معلومات