| تُو سلطان ہر اِک جہاں گیر کا ہے، تو آقا و مولا ہر اِک پیر کا ہے |
| تُو رہبر تُو ہادی ہر اِک میر کا ہے، یہ رتبہ تِرا کتنی توقیر کا ہے |
| تمہاری تو چلتی ہیں چودہ طبق مِیں، خدا نے دی ہر خلق تیرے نَسق مِیں |
| لکھو پیرِ حق! عشقِ حق میرے حق مِیں، تِرے ہاتھ مِیں خامہ تقدیر کا ہے |
| کَرو چشم و دل کا وضو اہلِ ایماں، چَلو پھر سبھی جانبِ شہرِ جیلاں |
| کہ عرس آج غوثِ زمن نورِ یزداں، سفیرِ حسنؑ اہلِ تطہیر کا ہے |
| جُھکا کر یہ سر بَر درِ غوثِ اعظمؓ، جو اُن کو پُکارا ہے با دیدہِ نم |
| اِسے شرک مت جان او انسانِ بودم، یہ رشتہ تو تعظیم و توقیر کا ہے |
| یہی مِہْر راہِ بَہِشْتِ بَریں ہے، یہی باخدا مجھ کو روشن نَگیں ہے |
| یہ اِک نقش منقوش جو بَر جَبیں ہے، مِرے شاہِ میراں کی تصویر کا ہے |
| اے غوثِ معظمؓ ولایت میں اُتَّم، مثیلِ مسیح و سُلیمانؑ و آدمؑ |
| ہو شاہدؔ پہ فضل و کرم اب ہمہ دم، تمہیں واسطہ پاک شبیرؑ کا ہے |
معلومات