| یہ بھی اس شوخ کا اندازِ جفا ہے مجھ سے |
| اب تلک چیں بہ جبیں بادِ صبا ہے مجھ سے |
| غنچہ و گل بھی پریشان ہے بلبل بھی خفا |
| گلشنِ عشق میں مغموم فضا ہے مجھ سے |
| دستِ صد ناز میں پاتا ہے سکوں وقتِ رفو |
| مجھ سے بہتر تو مری چاک قبا ہے مجھ سے |
| مجھ سے کہتا ہے یہ کس ناز سے ہنگامۂ دل |
| اے جنوں پیشہ ترے فن کی بقا ہے مجھ سے |
| میں کہ منصور نہیں مجنوں و فرہاد نہیں |
| پھر بھی آباد رہ و رسمِ وفا ہے مجھ سے |
| اب بیاں کس سے کروں حالتِ بیتابیٔ دل |
| تجھ سے منسوب ہر اک شخص خفا ہے مجھ سے |
| کس سے پوچھوں ترے احوالِ شبِ غم شاہیؔ |
| اب کہ محفل میں تری کون بچا ہے مجھ سے |
معلومات