| میں جب ناشاد ہوتا ہوں مرا دل شاد ہوتا ہے |
| کبھی میں شاد ہوتا ہوں تو دل ناشاد ہوتا ہے |
| نگاہِ ناز کی جادو بیانی کا بھی کیا کہنا |
| نگاہوں سے ادا بینی کا فن ایجاد ہوتا ہے |
| میں ہوتا ہوں جو محفل میں مری توصیف ہوتی ہے |
| نجانے کیا بھلا پیچھے مرے ارشاد ہوتا ہے |
| ہے عبرت خیز عالم گلشنِ ہستی کا اے احسنؔ |
| جدھر پرواز ہو میری ادھر صیاد ہوتا ہے |
| سمجھ آنے لگا ہے اب، کہ جو اقبالؔ کہتا تھا |
| جوانوں کی خموشی سے چمن برباد ہوتا ہے |
| کرم ہوتا ہے ساقی کا جواں ہوتا ہے جب مسلم |
| کہ ویراں مسجدیں اور میکدہ آباد ہوتا ہے |
| غنیمت ہے کہ ہیں موجود ابھی دنیا میں اہلِ دل |
| بھلا کب میکشوں سے سجدہ گہ آباد ہوتا ہے |
| الہی کیا چھپا ہوتا ہے اہلِ دل کی نظروں میں |
| کہ بے جاں دل نگاہِ لطف سے آباد ہوتا ہے |
| یہ دنیا قید خانہ ہے مسلماں کے لیے احسنؔ |
| جو کافر ہے یاں دنیا میں وہی آزاد ہوتا ہے |
معلومات