| جو نہ ہونا تھا وہ کیسے ہو گیا |
| لگ گئی کس کی نجانے بد دعا |
| چار دن کا ساتھ تھا پھر ہم جدا |
| مٹ نہ پایا تھا ابھی رنگِ حنا |
| "میں" ہمارے بیچ کیسے آ گئی |
| کھا گئی رشتوں کو اپنی یہ انا |
| کاش اس میں صبر ہوتا جو نہ تھا |
| سن تو لیتا وہ ہمارا مدعا |
| ساتھ تھا پر درمیاں دیوار تھی |
| فاصلہ ایسا تھا جو نہ مٹ سکا |
| اس بحث کا کچھ نہیں اب فائدہ |
| فیصلہ اب کیوں کریں کس کی خطا |
| اپنی منزل پر پہنچ نہ پائے ہم |
| ابتدا ہی سے غلط تھا راستہ |
| جاؤ جاتے ہو جہاں بس الوداع |
| خوش رہو میری تو ہے یہ ہی دعا |
| دل کا غم اب کس طرح ہلکا کروں |
| جام ہے نہ ہے کوئی بھی آشنا |
| چند سال بعد ۔ ۔ ۔ ۔ ۔ |
| جل رہا ہے وہ دیا دیوار پر |
| نام اس کا جس پہ ہے لکھا ہوا |
| اس کی خوشبو ہر طرف پھیلی ہوئی |
| چھو کے آئی ہے اسے بادِ صبا |
| اب بھی ہے امید کے شاید کبھی |
| سن کے آئے گا مرے دل کی صدا |
معلومات