| عید کا دن ہے گلے تم کو لگا لُوں آؤ |
| پیار کے رشتے نئے تم سے بنا لوں آؤ |
| روز آ جاتے ہو سپنوں میں ستانے تو مجھے |
| اپنی آنکھوں میں تمہیں پھر سے بسا لوں آؤ |
| محو ہو جاؤ نہ یادوں سے مری اے ہمدم |
| دل میں ارمان نئے پھر سے جگا لوں آؤ |
| دل میں جلتی ہوئی مشعل نہ کہیں بجھ جائے |
| یادوں کی شمع پھر اک بار جلا لُوں آؤ |
| ہم نے تو رسمِ وفا تم سے نبھانا سیکھی |
| میں اُسی طرح وفا اپنی نبھا لوں آؤ |
| تم سے کیا پردہ ہے تم خوب مجھے جانتے ہو |
| میں کہانی ذرا دنیا کو سنا لوں آؤ |
| کیسے فُرقت میں بِتائے ہیں تری یاد میں دن |
| کروٹیں راتوں کو بدلِیں جو بتا لوں آؤ |
| میرے اشکوں سے ترا نقش نہ دُھندلا جائے |
| میں ترا چہرہ پھر آنکھوں میں سجا لوں آؤ |
| میں نے جو عہدِ وفا تم سے کبھی باندھا تھا |
| خود سے اُس عہد کی تجدید کرا لوں آؤ |
| طارق اس عید پہ خوش ہوں میں خدا کی خاطر |
| تلخ یادوں کو میں کچھ دیر بُھلا لوں آؤ |
معلومات