| ہمیشہ مدینے میں تاباں زماں ہے |
| مدینے سے سارا منور جہاں ہے |
| مدینہ میں نوری صبا و مسا ہیں |
| مدینہ میں دائم ارم کا سماں ہے |
| مدینہ نگینہ ہے کونین رب کا |
| درخشاں مدینے میں ہر گلستاں ہے |
| سجے ہیں مدینے سے طالع دہر کے |
| عطائے مدینہ جہاں پر عیاں ہے |
| تسلسل ہے بارانِ رحمت میں اس جا |
| حبیبِؐ خدا کا جو روضہ یہاں ہے |
| کرے رشک اس پر ضیا طورِ سینا |
| منور یہاں کا زمان و مکاں ہے |
| مدینے سے توحید کا نور پھیلا |
| اٹھی اس جگہ سے بلالی اذاں ہے |
| یہ جا رحمتِ کبریا کا ہے قلزم |
| مدینے کی نوری سدا داستاں ہے |
| نبی سے مدینے کو توقیر حاصل |
| نبی سے مدینہ ہوا ضوفشاں ہے |
| کشادہ ہے داماں یہاں نوریوں کا |
| یہاں جانِ ہستی نبی جانِ جاں ہے |
| نبی پاس لائیں خطا والے نامے |
| طریقہ یہ قرآن کرتا بیاں ہے |
| ہیں جب بھی خطا کار آئے مدینے |
| شفیع اُن کو ملتا یہاں مہرباں ہے |
| ہے راضی خدا بھی خوشی میں نبی کی |
| اے محمود میرا نبی مہرباں ہے |
معلومات