| اُس نے پوچھا تو مُدّعا ہم سے |
| کیسے آئے ہو یہ کہا ہم سے |
| بد گُمانی تو تھی زمانے کو |
| اُس کو کوئی نہ تھا گِلہ ہم سے |
| ہم نے کب دوسروں کی پروا کی |
| فکر تھی وہ نہ ہو خفا ہم سے |
| کشتیٔ نوح میں ہیں سوچیں اب |
| چاہتا کیا ہے ناخُدا ہم سے |
| زندگی ہے سو وہ اسی کی ہے |
| اور مانگے گی کیا قضا ہم سے |
| سوچ لو راہ یہ کٹھن ہے ذرا |
| اُس نے پوچھا تھا بارہا ہم سے |
| چل پڑے ہم بھی ساتھ ساتھ اُس کے |
| اور کتنے تھے با وفا ہم سے |
| جان طارق اسی کے نام پہ کی |
| اِس سے بڑھ کر نہ کچھ ہوا ہم سے |
معلومات