| خیالِ نرگسِ مستانہ روز لاؤں میں |
| کہاں ہے وقت کہ تجھ پر نثار جاؤں میں |
| نظر ہے شوق سراپا دل و جگر مشتاق |
| زباں خموش لب و دہن کشمکش میں ہے |
| قلم اٹھا بھی لبِ تر سے آشنا بھی ہوا |
| مگر کہاں سے لکھوں ذہن کشمکش میں ہے |
| کہ سطر شیدا ہے نوکِ قلم کی جنبش پے |
| ورق درخشاں ہے امیدِ لطفِ خامہ پر |
| کسی مصورِ فطرت کی کاغذی تصویر |
| ہوئی ہی جاتی ہے قربان میرے نامہ پر |
| اسی مذاقِ فسانہ سے دل بہلتا ہے |
| اسی عذابِ حقیقت سے جی چراتا ہوں |
| کہ جس نزاکتِ گُل رُو سے دل ، جگر خوں ہے |
| اسی حسین ستم گر پہ جاں چھڑکتا ہوں |
| مجھے جنونِ محبت کا کوئی شوق نہ تھا |
| مگر کہ دل پہ مرا کچھ بھی اختیار نہیں |
| فراقِ صحبتِ خوباں پہ سوگوار ہے یہ |
| وہ کون پل ہے کہ جس پل یہ بیقرار نہیں |
| خزاں رسیدہ سے چہروں کی تازگی کے لیے |
| بہارِ حسن کسی دن نگاہِ ناز میں آ |
| شکستہ حال دلوں کی کرم نوازی کو |
| حسین پیکرِ تصویر کی نیاز میں آ |
| ابھی تو شام بھی دلہن سی سج رہی ہوگی |
| ابھی تو شب بھی جوانی کی اور جائے گی |
| ابھی ستاروں کی گردش بھی تیز ہونی ہے |
| ابھی تو صبحِ درخشاں امید لاۓ گی |
| امیدِ لطفِ ستم گر سے گو بہل جاؤں |
| مگر یہ روگِ جوانی مجھے ستاتا ہے |
| بڑے ہی ناز سے پالا تھا شوق جو میں نے |
| وہ شوقِ عشق مجھے رات بھر رلاتا ہے |
| سو تیری یادوں کو دل سے میں دور رکھتا ہوں |
| مبادا ! تیری طلب کا اسے جنون آجائے |
| غزل سرائی سے یوں مجھ کو رسم و راہ نہیں |
| مگر میں لکھتا ہوں ، دل کو سکون آجائے |
| شبانہ روز ترا گیت گنگناؤں میں |
| کہاں ہے وقت کہ تجھ پر نثار جاؤں میں |
معلومات