| میں خود کو کھو رہا ہوں مجھ کو بچائے کوئی |
| میرے وجود کا پھر سپنا دکھائے کوئی |
| وہ دل وہ شہرِ امید وہ گل وہ باغِ خورشید |
| ویران ہو چکا ہے اس کو بسائے کوئی |
| وہ جس کو میں ابھی تک اپنا وجود کہتا |
| موجود ہے کہیں تو مجھ کو دکھائے کوئی |
| اب تو میں خواب گر کی ہر بات سے ہوں واقف |
| جو درمیاں ہے پردہ اس کو ہٹائے کوئی |
| دل تو یوں پھولوں سے بھی اکتا ہی جاتا ہے پھر |
| کانٹوں سے رشتہ آخر کب تک نبھائے کوئی |
| کیا ہے نصیب میں گر بس انتظار ہی ہے |
| یوں بھی جی ہی لیں گے ہم آئے نہ آئے کوئی |
| زندہ دلی ہی تو ہے دشتِ وجود یارو |
| یہ لوگ ، زندہ لاشیں ان کو جگائے کوئی |
| میرا بھی خواب تھا یہ جاناں کبھی یوں بھی ہو |
| میں روٹھ جاؤں مجھ کو مجھ سا منائے کوئی |
معلومات