| تم نے معراج کی شب پردے کے باہر دیکھا |
| ہم علیؑ والوں نے منظر پسِ منظر دیکھا |
| اس نے کیا دیکھا، اگر خلد کا منظر دیکھا |
| جاکے جس نے نہ کبھی روضۂِ سرورؑ دیکھا |
| جب سے رکھی ہے جبیں در پہ تمہارے مولاؑ |
| ہم نے دنیا کی طرف پھر نہ پلٹ کر دیکھا |
| کس کی آمد سے مچی ہے سرِ ساحل بھگدڑ |
| کون آتا ہے یہ موجوں نے اُبھر کر دیکھا |
| دھڑکنیں ایک دقیقے میں بہتّر(۷۲) پائیں |
| دل کی دھڑکن کو جو ہم نے کبھی گن کر دیکھا |
| ایک نقطے میں نظر آنے لگی کرب و بلا |
| لفظِ عباسؑ جو قرطاس پر لکھ کر دیکھا |
| منظر بُت شکنی ہو، یا ہو خُم کا منظر |
| ہم نے قرآن کو قرآن کے اوپر دیکھا |
| ہو گیا راز عیاں طور پر بیہوشی کا |
| حسنِ یوسفؑ نے جو حسنِ علی اکبرؑ دیکھا |
| لاش اُٹھی نہ تو بچوں کو صدا دی آؤ |
| پہلے شہ نے علی اکبر کو اُٹھا کر دیکھا |
معلومات