| میں نے اس رنگ میں بھی رب کی عبادت کی ہے |
| اس کی مخلوق کو چاہا ہے، محبت کی ہے |
| کیوں نہ روؤں کہ اُس اک شخص نے نفرت کی ہے |
| خام سے کام میں دن رات کی محنت کی ہے |
| درد پائے ہیں محبت کے صلے میں مَیں نے |
| مجھ سے دنیا کے اصولوں نے عداوت کی ہے |
| شعر گوئی کوئی جذبات کا تو کھیل نہیں |
| بات ساری ہی یہاں فہم و فراست کی ہے |
| جو نہ حاصل ہوا کچھ بھی تو سمجھ آیا مجھے |
| بات نیّت کی نہیں، بات تو ہمّت کی ہے |
| جس نے اِس ملک میں سچ بولنے کی جرات کی |
| اس نے دستورِ ریاست سے بغاوت کی ہے |
| اس نے رکھے ہیں روابط جو رقیبوں سے تو کیا |
| اس کو الفت بھی تو اک شاخ سیاست کی ہے |
| ان کو دل دے کے یہ احساس ہوا ہے ثاقبؔ |
| میں نے واپس انہیں ان ہی کی امانت کی ہے! |
معلومات