| کوئی ہم کو روکے یہ ہمت کسی کی |
| وہ جنرل کا بیٹا میں کرنل کی بیوی |
| کہاں ہم کہاں اس سپاہی کو دیکھو |
| کہاں نیلی پیلی کہاں خاص وردی |
| یہ موسم ہی کیا یہ مناظر، ہے اپنی |
| سیاہی شبوں کی سفیدی سحر کی |
| زمینیں ہماری ہیں حد نظر تک |
| سروں پر، ہے اپنا فلک لاجوردی |
| ہیں موسم کی رنگینیاں اپنے دم سے |
| خزائیں بہاریں یہ سب سردی گرمی |
| حدیں دیس کی سرحدوں کی ہیں لیکن |
| نہیں کچھ حدودیں ہماری حدوں کی |
| ہماری گزر گاہیں مسدود کر دے |
| گوارہ نہیں ایسی پولیس گردی |
| جو بیٹھیں پہاڑوں کے دل بیٹھ جائیں |
| چلیں تو لرزنے لگے ساری دھرتی |
| بھلا پھر یہ توہین کیوں ہو گوارہ |
| کوئی پوچھے ہم سے ہے مرضی کدھر کی |
| نہ مانیں کسی کی بھی کچھ، طاقتوں نے |
| حبیب ان سروں میں ہوا ایسی بھر دی |
معلومات