| غم زدہ ہے, شاد ہے |
| دل بھی اِک اضداد ہے |
| کیسی یہ اُفتاد ہے |
| اُن دِنوں کی یاد ہے |
| وائے قسمت! باغ پر |
| پہرہِ صیّاد ہے |
| مجھ کو اِتنا مَت سَتا |
| زندگی! فریاد ہے |
| ہوتی ہے تعمیرِ اشک |
| دردِ دل بنیاد ہے |
| در حقیقت زندگی |
| زندگی کے بعد ہے |
| مر چلے, پھر بھی اُنہیں |
| حسرتِ بیداد ہے |
| ظلم سہنے کو, مجھے |
| عشق کی امداد ہے |
| شکوہِ قیدِ قفس |
| سَرمَدی مُعتاد ہے |
| ہم کو دکھ ہے, جو ہمیں |
| جراتِ فریاد ہے |
| دیکھیے کیا ہو, مَیں ہوں |
| تیشَہِ فرہاد ہے |
| مجھ کو تاریخِ وصال |
| صورتِ اَعیاد ہے |
| ریختے میں, ایک میرؔ |
| لاکھوں کا استاد ہے |
| بوسہِ لب کی یہ روک |
| ظلم ہے, بیداد ہے |
| آ گئے گاؤں سے, پر |
| دل وَہیں آباد ہے |
| اب کہاں دیر و حرم |
| مے کَدہ آباد ہے |
| تیرا شاہدؔ تیرے بعد |
| خانماں برباد ہے |
معلومات