| ادھر قیامت کہ جل رہا دل |
| ادھر ہے جشنِ بہارِ محفل |
| ہر ایک لمحہ ہو بے قراری |
| یہی ہے عمرِ رواں کا حاصل |
| دل و نظر سے اتار تو دیں |
| مگر بھلانا بہت ہے مشکل |
| اسی کو ترسی ہیں پھر نگاہیں |
| ہے جس کے عارض پہ جابجا تل |
| ہر اک ادا جس کی قاتلانہ |
| ہے صورتِ گل وہ پیکرِ گل |
| فریبِ حسن و جمال دے کر |
| کیے ہیں گم رہ ہزاروں عاقل |
| مجال میری کہ بچ سکوں میں |
| جو ٹھہرا ناداں ، میں بھولا ، غافل |
| سفینۂ دل ہے کشمکش میں |
| ہے موجِ دریا سے دور ساحل |
| مری کتابِ حیات کی اب |
| ہر اک عبارت کا ایک محمل |
| امید مجھ سے بھلی ہے لیکن |
| کہاں جواں دل ہو پیرِ کامل |
| نہ جانے کس کی نظر لگی ہے |
| ہوا ہوں میں دل جلوں میں شامل |
| کہاں تلک اس کا تذکرہ ہو |
| کہاں تلک اس کی چاہ ہو دل |
| یہی مقدر ہے عاشقوں کا |
| تڑپتے رہنا مثالِ بسمل |
| اسی کو زیبا ہے عیش و مستی |
| ہو جس کے پہلو میں بیٹھا قاتل |
| یہ داستاں ہے دکھے دلوں کی |
| کوئی فسانہ نہ کوئی ناول |
| بھٹک گیا جو نشانِ رہ سے |
| کہاں سے حاصل ہو اس کو منزل |
| پڑی ہے تاریک دل کی بستی |
| اجالا کردے اے ماہِ کامل |
| شرابِ دید و وصال دے دے |
| مجھے بھی اب تو اے شمعِ محفل |
| یہی ہے سچ کہِ خیال تیرا |
| کیا زمانے سے مجھ کو غافل |
| اے جانِ شاہیؔ تو آ بھی جا اب |
| کہ پھینکا پھینکا ہے رنگِ محفل |
معلومات