| زہے قسمت سعادت یہ عطا ہو |
| دل و جاں سب محمد ﷺ پر فدا ہو |
| مرا مقصود بس تیری غلامی |
| زمانہ مجھ سے ہوتا ہے خفا ہو |
| تڑپتا رہتا ہے ہجرِ نبی میں |
| دلِ بے تاب کی کوئی دوا ہو |
| کریم ایسا کہ ہر ظلم و ستم پر |
| کہے دشمن سے بھی تیرا بھلا ہو |
| الٰہی زندگانی میں ہمیشہ |
| درودِ پاک ہی لب پر سجا ہو |
| فنا اس کو اجل بھی کر نہ پائے |
| ترے قدموں پہ جو قرباں ہوا ہو |
| نثار اس کے مقدر پر دو عالم |
| نبی کا عشق جس دل میں بسا ہو |
| مرے آقا شفیعِ عاصیاں ہیں |
| عجب کیا ناز دامن میں چھپا ہو |
| دمِ رخصت ہو جب نازِ حزیں کا |
| لبوں پر نغمۂ صلِ علیٰ ہو |
معلومات