| جہاں لاگو نئی تہذیب کا فرمان ہو جائے |
| وہاں ایمان کا انسان میں فقدان ہو جائے |
| جہاں اُترے نئی تہذیب کا خنجر رگِ جاں میں |
| وہاں پر خاکی انساں آتشیں شیطان ہو جائے |
| جہاں مکر و ریا اور جھوٹ کی دستار بندی ہو |
| وہاں سچ بولنے والا پسِ زندان ہو جائے |
| جہاں شرم و حیا کے ضابطے فرسودگی ٹھہریں |
| وہاں نیکی بدی کی ختم ہر پہچان ہو جائے |
| جہاں پر فرق مٹ جائے ہوس میں اور محبت میں |
| وہاں پاکیزہ چاہت کا بہت فقدان ہو جائے |
| بنامِ عشق لٹ جائے جہاں پر کاروانِ دل |
| وہاں رختِ دل و جاں کا بہت نقصان ہو جائے |
| جہاں کی عارضی لذت کی خاطر آج کا انساں |
| ابد کی نعمتوں سے ہائے کیوں انجان ہو جائے |
| سحاب اب تو جہانِ بے اماں سے کوچ ہی کر جا |
| کہیں ایسا نہ ہو مردہ ترا ایمان ہو جائے- |
معلومات