| آنکھوں میں اشک باری ہونٹوں پہ تشنگی تھی |
| مکہ سے جب مدینہ ان کی روانگی تھی |
| کعبہ نگاہ میں تھا اور دور جارہے تھے |
| دل میں ہزار حسرت ، رنجور جا رہے تھے |
| لیکن کسے خبر تھی جو دور جارہے ہیں |
| وہ شہسوار پوری دنیا پہ چھا رہے ہیں |
| اک رات سرورِ دیںﷺ یثرب میں سو رہے تھے |
| فتحِ مبیؔں کا منظر نظروں میں ہو رہے تھے |
| اسلام پھیلنے کو بیتاب ہو رہا تھا |
| تاروں سے آگے چل کر مہتاب ہو رہا تھا |
| سجدے میں سر جھکائے پہونچے ہیں آپ مکہ |
| جاری ہوا جہاں میں پھر شاہِ دیں کا سکہ |
| حق آگیا ہے باطل فانی ہے مٹنے والا |
| کیا ہے کوئی محمدﷺ کے آگے ٹکنے والا |
| جو جان کے تھے دشمن ان کو امان دی ہے |
| حرمت حرم کی رکھا عظمت کو شان دی ہے |
| کرتے ہیں معاف سب کو وہ رحمتِ دو عالم |
| لاکھوں درود ان پر پروردگارِ عالم |
| وہ رحمتوں کے پیکر وہ نور کا مجسم |
| محبوبِ کبریا وہ ہیں انبیاء کے خاتم |
| اس مصطفیٰ کے صدقے احسان ہم پہ کردے |
| دینِ محمدیﷺ کو ذیشان پھر سے کردے |
| وہ رعب و دبدبہ دے وہ شانِ بے نیازی |
| جینے کا دے سلیقہ اندازِ دل نوازی |
| عظمت کی اس بلندی کو پھر سے رام کرلیں |
| نورِ سحر سے مولی ظلمت کی شام کرلیں |
| امت ترے نبی کی دردر بھٹک رہی ہے |
| اغیار کی نگاہوں میں کیوں کھٹک رہی ہے |
| کشتی بھنور میں ہے جو یا رب کنارا دے دے |
| بے آسرا مسلماں کو تو سہارا دے دے |
| وہ عزم و ولولہ دے جس سے دلِ بتاں کو |
| روۓ زمین کو بھی دہلا دوں آسماں کو |
| سارے جہاں کو میرے قدموں میں لا گرا دے |
| شاہی ؔ کو پورے عالم کا تاج ور بنا دے |
معلومات