| کیا محبت کی سنتے ہو اب داستاں |
| کیا بنا , کیا ہوا , الاماں الاماں |
| تُو بچھڑ جائے گا ,میں اُجڑ جاؤں گا |
| میں نے بولا جو تھا تجھ سے پیرِ مغاں |
| پوچھ مت پوچھ مت ورنہ پھٹ جائے گا |
| میرے سینے میں پلتا ہے آتش فشاں |
| تُو کہیں کھو گیا , وقت کا ہو گیا |
| نقش دھندلا گئے ایسا اُٹھا دھواں |
| نا ہوئی میری کوئی دعا کارگر |
| ایسا دشمن بنا ہے مرا آسماں |
| ہجر کے دن بھی گویا غنیمت ہوئے |
| تیری یادیں بنی میری روحِ رواں |
| بزمِ جاناں میں اُن کی بڑی دھوم ہے |
| مٹ گیا عشق میں جن کا نام و نشاں |
| بے دلی ہی رہی زخم چھلتے رہے |
| ساتھ بہتی رہی نہرِ اشکِ رواں |
| درد تھم نا سکا رُت بدل نا سکی |
| اور چُپ چاپ ہیں یہ زمین و زماں |
| چلنا پھرنا کُجا میں تو اُٹھ نہ سکوں |
| تیری چاہت میں پایا وہ , بارِ گراں |
| پل میں جیتے رہے پل میں مرتے رہے |
| بے خبر ہی رہی , صحبتِ دوستاں |
| ہجر کی دھوپ سہہ کر ہی مل پائے گی |
| عشق کی روشنی , جاوِداں جاوِداں |
| مرشدِ محترم کر, خصوصی کرم |
| عرض میری سُنے, ربِ کَون و مکاں |
| شہرِ جاناں میں یاسر سبھی خوب ہیں |
| کیا وہ سرِ نہاں کیا وہ ضبطِ فغاں |
معلومات