| گزرے دِنوں میں جانِ جاں تم کون تھے میں کون تھا |
| کچھ یاد کر وہ داستاں تم کون تھے میں کون تھا |
| جو مرتے تھے اک دوجے پر بے چین رہتے رات بھر |
| آخر ہوئے جو رائگاں تم کون تھے میں کون تھا |
| جن کے دلوں کی دھڑکنیں اب جم گئیں ہیں سردی سے |
| جو ساتھ تھے پچھلی خزاں تم کون تھے میں کون تھا |
| حالات کے گرداب میں بکھرا دلوں کا کارواں |
| اجڑا ہمارا ہر گماں تم کون تھے میں کون تھا |
| وہ عشق کا پہلا سفر وہ وصل کے دن یاد ہیں ؟ |
| جو تھے کبھی یک جا یہاں، تم کون تھے میں کون تھا |
| اب سوچتا ہوں رات دن، کیا تھی حقیقت خواب کی |
| تھا کون کس کا مہرباں تم کون تھے میں کون تھا |
| جو عشق کے صحرا میں بھی سپنے گلوں کے دیکھتے |
| تھے درد سے جو نیم جاں تم کون تھے میں کون تھا |
| مجھ کوسمجھ آئی نہیں اب تک شرارت لمحوں کی |
| تھا کیا ہمارے درمیاں تم کون تھے میں کون تھا |
معلومات