| جادۂ حق پر سدا قائم رہا تیرا قلم |
| کیا عروسِ انجمن کیا خانقاہوں کے علم |
| حالی و اکبر کا بھی مخفی نہیں رنج و الم |
| پر ترے شعروں سے مَیں سمجھا جہادِ بالقلم |
| تیرا ہر شعر و سخن تو عظمتِ اسلام ہے |
| پس چہ باید کرد گویا امن کا پیغام ہے |
| تیرے ہر نوکِ قلم میں کیا عجب تاثیر تھی |
| جُنبشِ خامہ سے لرزاں سلطنت نخچیر تھی |
| تُو اگر چاہتا تو تیرے ہاتھ میں تقدیر تھی |
| مال و زر تھا سروری تھی مفت کی جاگیر تھی |
| پر ترا رُوئے سُخن بس مرکزِ اقرا رہا |
| قوم پر نظریں رہیں دِل جانبِ بطحا رہا |
| ہم ترے مقروض ہیں یہ برملا اقرار ہے |
| تیرے شاہینوں سے پہنائے فلک بیزار ہے |
| طائرِ لاہوت سے طاہر کوئی مردار ہے |
| پیرِ رومی کی حدیثِ آرزو بیکار ہے |
| مطلعِ انوار ہے نہ جادۂ حق کا گداز |
| عشقِ بر دوشِ غلاماں عقل بر ترکانِ تاز |
| جعفر و صادق کی پاکستان میں بھر مار ہے |
| قوم ہے زیرِ نگوں تو سر نگوں سرکار ہے |
| ایک بازو کٹ گیا ہے دوسرا بے کار ہے |
| اس سے اگلا مرحلہ کچھ اور بھی دشوار ہے |
| کاش کوئی جانتا کس بات پہ معتوب ہیں |
| سرورِ اقدس ہیں نالاں اسلئے مغضوب ہیں |
| ہر عمارت میں تری فوٹو پہ تیرا نام ہے |
| بس یہی اقبال کا پیغامِ خاص و عام ہے |
| رشوتیں ہیں چور بازاری ہے قتلِ عام ہے |
| تیرے خوابوں کی زمیں دشنام ہے بدنام ہے |
| تیرے سپنوں کا نگر مسمار ہے ویران ہے |
| خواب تو بس خواب تھا تعبیر پاکستان ہے |
| حذف کر دے قرطبہ کی نظم اے پروردگار |
| گر دلم آئینہ والے شعر بھی کر لے شمار |
| جب بھی پڑھتا ہوں انہیں قلب و جگر میں انتشار |
| ہر گھڑی کُڑھنا تڑپنا ہر زماں سینہ فگار |
| یا مجھے عصرِ رواں کی حسرتوں پر چھوڑ دے |
| یا مرا اقبال سے مضبوط رشتہ جوڑ دے |
معلومات