| کس بن میں بہار آئی ہے غنچہ و گل خنداں |
| بلبل کہ ہے نغمہ سرا ، گلزار کہ گل افشاں |
| اس وادیٔ عرفاں کا ہر شعلہ سکوں آمیز |
| ہر دشت جنوں انگیز ، ہر ذرہ مہِ تاباں |
| یہ بزم جہاں پیدا ہوتے ہیں جنوں پرور |
| اس بزم کے دیوانے ہر دشت میں ہوں کوشاں |
| اے جذبۂ دل کیا ہے حلّاج کا رمزِ " انا " |
| کیا نقشِ جنوں ساماں ؟ یا عکسِ رخِ جاناں |
| معلوم ہیں افسانے صحرا و بیاباں کے |
| پر لے تو خبر اپنی اے قیسِ جنوں ساماں |
| اورنگِ دل و جاں پر ہے کس کی شہنشاہی |
| ہے عالمِ وحشت اور تنہا تو پسِ زنداں |
| کچھ رنگِ چمن دیکھو کچھ حرفِ سخن سمجھو |
| آشوبِ غمِ فرقت اور اشکِ تہِ داماں |
| جب ماند ہو جذبۂ دل ، آرام طلب بسمل |
| کیا مستئ رندانہ ، کیا جلوۂ جانِ جاں |
| جس بزم سے رندوں کو ہو شکوۂ تشنہ لبی |
| اے بادہ پرست تجھ کو وہ بزم نہیں شایاں |
| نظروں سے نہ اوجھل ہو منزل ، نہ نشانِ رہ |
| یہ ذوقِ سفر تجھ کو ہر لمحہ رکھے کوشاں |
| آباد رہو دائم اے عشقِ جنوں پیشہ |
| ہوں تجھ پہ ہزاروں سال پل بھر کی طرح آساں |
| اے عزم و جنوں پیکر ! یہ رتبہ ملے تجھ کو |
| عقبی میں غلام اس کا دنیا میں شہِ شاہاں |
| اس محفلِ انور کی ہر شمعِ جہاں افروز |
| دنیائے شہِ دیں کو ہر آن کرے تاباں |
| پروانوں کو مل جائے نقشِ رہِ دیرینہ |
| یہ شمعِ فروزاں یونہی تا صبح رہے سوزاں |
معلومات