جھمکا جاناں

تِرے گوشِ ناز کے وہ ستارے، جو زلفِ خم میں بکھر گئے

وہی میرے بخت کی روشنی، وہی میرے خواب سنور گئے

وہ لرزتا جُھمکا ہے برقِ نو، ہے جو فتنہ سنگِ گراں مِرے

جو تِری قبا پہ لرز گیا، تو جہان و دہر نکھر گئے

وہ جو اک ستارہ چمک اٹھا، تِری زُلف و رُخ کے حصار میں

اسی اک جھلک کی تلاش میں، کئی قافلے ہی گزر گئے

تِرے حُسن کی وہ تجلیاں کہ زمانہ سکتہ میں آ گیا

مہ و مہر دونوں تِرے ہی رُخ کی ضیا میں آ کے ٹھہر گئے

اُسی دامِ زُلف کے سائے میں تِری چشمِ تر کی وہ شوخیاں

جو خطا تھی حُسنِ کمال کی، وہ گناہ سب کے ہی سَر گئے

وہ جو زلفِ خم کے اسیر تھے، تِرے رُخ کی تاب نہ لا سکے

وہ جو تیر کھا کے گرے نہیں، وہ تِری ادا سے ہی مر گئے

تِری چشمِ مست کے سامنے، یہ جو عکسِ لعل و گہر پِھرے

کئی مے گسار تو دیکھ کر، تِری بزم سے ہی سدھر گئے

ہوئی جُنبشِ سَرِ ناز یوں کہ فضا میں رقصِ بہار ہے

جو رُکے تو وقت ٹھہر گیا، جو ہِلے تو خواب سنور گئے

وہ لرزتا جُھمکا ہے جاں فزا، ہے یہ انجمِؔ شبِ کہکشاں

اسی ایک رقص کی موج میں، کئی ڈوبتے ہی ابھر گئے