| شکریہ ہمسفر |
| میرے جیون میں آئی تُو بن کے سَحَر |
| زندگی بن گئی روشنی کا سفر |
| مشکلیں زندگی میں رہیں جس قدر |
| ہاتھ مضبوط تھامے رہی عمر بھر |
| اے مری ہم نوا اے مری ہم سفر |
| بوجھ بانٹے مرے تو نے ہر گام پر |
| گو تہی ہاتھ نکلے تھے گھر چھوڑ کر |
| رفتہ رفتہ ملا خوب سے خوب تر |
| زِندگی اکِ مسلسل جَدوجہد تھی |
| ہنستے ہنستے کیا تم نے اِس کو بَسر |
| اے مری ہم نشیں اے مری ہم سفر |
| بوجھ بانٹے مرے تو نے ہر گام پر |
| ظَرف و اَخلاق میں بھی ہو تم معتبر |
| تم سے سیکھے کوئی گفتگو کے ہنر |
| جیت لیتی ہو اپنے پرائے کا دل |
| پُر کشش ہنستی صورت ہے جاذب نظر |
| اے مری مہ جبیں اے مری ہم سفر |
| بوجھ بانٹے مرے تو نے ہر گام پر |
| پہلے بیٹی جَنی تُو نے نُورِ نظر |
| پھر دو بیٹے دیئے دونوں لختِ جگر |
| میری آغوش خوشیوں سے تم نے بھری |
| تیری خوشبو سے مہکا رہے میرا گھر |
| اے مری ہم نفس اے مری ہم سفر |
| بوجھ بانٹے مرے تو نے ہر گام پر |
| اے مری ہم سفر میری رشکِ قمر |
| اپنے منصب کی رکھنا بخوبی خبر |
| میرے دل پر تری حکمرانی چلے |
| تیری خوشیاں رہیں میرے پیشِ نظر |
| اے مری دل رُبا اے مری ہم سفر |
| بوجھ بانٹے مرے تو نے ہر گام پر |
| زندگی چاہے لمبی ہو یا مختصر |
| ہنستے گاتے بِتانا ہے سارا سفر |
| عالیہ تم سے روشن ہے میری جبیں |
| تجھ سے منسوب ہے میرے دل کا نگر |
| شکریہ دل رُبا شکریہ ہم سفر |
| بوجھ بانٹے مرے تو نے ہر گام پر |
| شہاب احمد |
| ۲۰ ستمبر ۲۰۱۹ |
معلومات