| درجے ہیں اعلیٰ دہر میں، سارے حضور کے |
| ہستی میں گونجتے ہیں، نکارے حضور کے |
| رہتی رواں جہاں میں ہے، توصیفِ مصطفیٰ |
| دارین میں ہیں ڈنکے، ہمارے حضور کے |
| افصح عرب کے نازاں تھے اپنے کلام پر |
| تھے گُنگ سامنے کھڑے سارے حضور کے |
| چومے نبی کے جوڑے ہیں، عرشِ برین نے |
| ہیں لامکاں نے دیکھے نظارے حضور کے |
| اعلیٰ کیا خدا نے یوں ذکرِ حبیب کو |
| بر ہر زبانِ خلق ہیں، نعرے حضور کے |
| دھومیں مچی ہیں دہر میں لُطفِ لبیبؐ کی |
| ابرِ کرم جو برسے پیارے حضور کے |
| ہے اختیارِ مصطفیٰ کونین میں سوا |
| شمس و قمر نے مانے اشارے حضور کے |
| وہ بانٹتے جہاں میں ہیں، مولا کے فیض کو |
| کامل ہیں ہر عطا پہ، اجارے حضور کے |
| ہیں قُرباں جان و دل سے جو، آلِ رسول پر |
| کہلائیں گے وہ حشر میں سارے حضور کے |
| مژدہ یہ عاصیوں کو درِ مُصطفیٰ سے ہے |
| دن رات ہی کُھلے ہیں، ادارے حضور کے |
| محمود دوریاں ہوئیں، فکر و ملال سے |
| مامن ہیں مومنیں کو، سہارے حضور کے |
معلومات