| اخلاق و عمل کے پیکر ہیں وہ فخرِ چمن مولانا رفیق |
| اور علم و ہنر کے محور ہیں وہ تاجِ سُخَن مولانا رفیق |
| الفاظ میں موتی بکھرے ہیں، انوارِ ہُنَر بھی نکھرے ہیں |
| ہر حرف سے چشمے ابھرے ہیں، وہ علمی گَگَن مولانا رفیق |
| لہجے میں خوشی کا نغمہ ہے، ہنس ہنس کے پڑھانا شیوہ ہے |
| نورانی سا روشن چہرہ ہے، وہ مشک خُتَن مولانا رفیق |
| ہر گام سبھی سے الفت ہے، ہر طالبِ فن پر شفقت ہے |
| ہر قلب میں جن کی عظمت ہے، وہ سایہ فِگَن مولانا رفیق |
| ہر فعل اصولوں پر مُحکَم، ہر خیر میں بھی کوششْ پَیہَم |
| حق بات کا ہاتھوں میں پرچم، وہ حق کی کِرَن مولانا رفیق |
| کیا عشقِ نبی، کیا دینی شَغَف، اور زُہد و وَرَع میں طَرزِ سَلَف |
| ہر شام و سَحَر بس عِزّ و شَرَف، وہ نورِ زَمَن مولانا رفیق |
| امت کے غموں کو وہ شب بھر، ہیں رب کو سناتے رو رو کر |
| اشکوں سے دَہَن کو دھو دھو کر، وہ غم میں مَگَن مولانا رفیق |
| تجھ کو جو مُنَوَّر فیض ملا، کیا خوب ترا یہ بَخْتْ کُھلا |
| تو ناز کرے کیوں کر نہ بھلا، وہ نازشِ فَن مولانا رفیق |
معلومات