| اکثر اپنا پیار جتانے آتا ہے |
| مَیں رُوٹھوں تو یار منانے آتا ہے |
| جو منزل اور رستے سے بے بہرہ ہو |
| وہ بھی مجھ کو راہ دکھانے آتا ہے |
| شہزادے کے بھیس میں کوئی راتوں کو |
| شہزادی کے خواب چُرانے آتا ہے |
| ایک دیا رکھتا ہے روشن،آنکھوں میں |
| جس سے من میں آگ لگانے آتا ہے |
| بھر جاتا ہے میری آنکھ میں آنسو وہ |
| جب جب پیار کے گیت سنانے آتا ہے |
| اس کی آنکھیں سب باتیں کہہ جاتی ہیں |
| وہ ہم سے ہر بات چھپانے آتا ہے |
| وہ کردار چمکتا رہتا ہے مانی |
| جو دنیا میں دیپ جلانے آتا ہے |
معلومات