| تیرہ شب میں قمر نہیں ہوتا |
| اور وقتِ سحر نہیں ہوتا |
| خدمتیں فرض گرچہ ہوتی ہیں |
| باغباں کا شجر نہیں ہوتا |
| میری سانسیں بحال کب ہوتیں |
| وہ مسیحا اگر نہیں ہوتا |
| مجھ کو تیری کمی ستاتی ہے |
| اب کے تنہا سفر نہیں ہوتا |
| خواہشیں مارنی ہی پڑتی ہیں |
| یوں تو جیون بسر نہیں ہوتا |
| صبر سے کام گر نہ ہو کوئی |
| اتنا شیریں ثمر نہیں ہوتا |
| میں تو غزلوں پہ غزلیں کہتا ہوں |
| اُس پہ کوئی اثر نہیں ہوتا |
| بھول بیٹھے ہیں لوگ یہ ثاقبؔ |
| کہ خدا بے خبر نہیں ہوتا |
معلومات