| مری سوچوں کو اندازِ نمُو دے |
| خِرد کو دِل دے دِل کی آرزو دے |
| جو تِیرہ ہیں انہیں کر دے منوّر |
| منوّر کو رہِ یثرب کی خُو دے |
| ممیزّ کر مرے صِدقِ عمَل کو |
| عَمَل کو عِلم کا جام و سبو دے |
| مصائب میں قُر آ ں سے استعانت |
| زباں کو کلمئہ لا تقنا طُو دے |
| کہیں مڈ بھیڑ کا آ جائے لمحہ |
| دلوں کو جوڑنے کی گفتگو دے |
| ترے بحرِ کرم کی حد نہیں ہے |
| مرے تشنہ لبوں کو آبجُو دے |
| ہو جسمِ عنصری جس سے مُطہرّ |
| مرے اللّہ مجھے ایسا وضو دے |
| مرے شوقِ ہُدیٰ کو تیز تر کر |
| دِلِ خوابیدہ کو اللّہ ہُو دے |
| عطا کر عِلم کو فقر و غِنا سے |
| عَمَل کو باغِ جنّت کا سبو دے |
| دلوں کو گرم کردے جو زباں سے |
| مری شریان میں ایسا لہو دے |
| ہمیں اُن فتنوں سے محفوظ کرلے |
| جو زنبیلِ شرر میں فتنہ جُو دے |
| جو ہر دل کے تڑپنے میں مزا لے |
| کبھی ایسا نہ عاشق کو عدو دے |
| مَیں سفّر ہو گیا ذوقِ سفر میں |
| مجھے منزل کا شَوق و جستجو دے |
| مَیں کب سے راستوں میں ہوں خُدایا |
| مجھے باغِ عدن کی جستجو دے |
| جو ہر تیرہ شبی کو دُور کر دے |
| مجھے جنّت میں ایسی آبرو دے |
معلومات