| تمہاری دید کی آخر لکھیں گے داستاں کب تک |
| رہیں گے منتظر یوں ہی بھلا دونوں جہاں کب تک |
| مرے دشتِ تمنا میں گلِ اُمِّید کھل اٹھیں |
| خبر مل جائے تھوڑی سی کہ پہنچوگے یہاں کب تک |
| تقاضائے محبت ہے کہ اب تو رو برو ہو جا |
| رکھوں اس عشق میں مولاؑ عریضہ درمیاں کب تک |
| عجب حسرت ہے، تفسیرِ سَلُونِی میں سمجھ جاؤں |
| سنائی دے گا بولو تو علیؑ سا وہ بیاں کب تک |
| ہم ایسے خاک کے ذرُّوں پہ لطفِ خاص فرمائیں |
| مِہَر یہ دور سے ہوتی رہے گی مہرباں کب تک |
| ضرورت ہے کہ بازارِ عدالت گرم ہو جائے |
| کھلیں گی سب بنامِ عدل یہ فرضی دکاں کب تک |
| مرورِ دھر سے پوچھا ہے اکثر یہ زلیخاؑ نے |
| بتاؤ تو رہیں گے مہدؑئ دوراں جواں کب تک |
| بنِ زہراؑ ندائے "یَا لَثَارَاتَل" اٹھاؤ اب |
| بنِ مریمؑ کریں آخر یہ سیرِ آسماں کب تک |
| سکونِ عالمِ امکاں ، مصلےٰ بھی بچھا دیجے |
| مچلتا ہی رہے گا رات دن آبِ رواں کب تک |
| یہ رازِ مرضیٔ وحدت اگر چاہو تو بتلا دو |
| "رہوگے پردۂ غیبت میں اے مولاؑ نہاں کب تک" |
| صدائے "قَد ظَھَر" آنے لگے اشعار سے بڑھ کر |
| میَسَّر ہوگی میرے لفظوں کو آخر زباں کب تک |
معلومات